सरकारले थप्यो दुई आयोगको म्याद

काठमाडौँ, २७ माघ । सरकारले सत्यनिरुपण तथा मेलमिलाप आयोग र बेपत्ता पारिएका व्यक्तिको छानबिन आयोगको म्याद एक वर्ष थप गरेको छ ।

प्रधानमन्त्री निवास बालुवाटारमा आज बसेको मन्त्रिपरिषद् बैठकले दुवै आयोगको समयावधि एक वर्ष थप्ने निर्णय गरेको सरकारका प्रवक्ता एव्म सूचना तथा सञ्चारमन्त्री सुरेन्द्रकुमार कार्कीले जानकारी दिनुभयो ।

ती दुवै आयोगको आजै समयावधि सकिएको थियो । आयोगले सिफारिस गरेबमोजिम दुवै आयोगको कार्यकाल एक वर्षका लागि थप गरिएको सूचना तथा सञ्चारमन्त्री कार्कीले बताउनुभयो ।

सरकारले १० वर्षे द्वन्द्वकालीन घटनाका पीडितलाई राहत र दोषीलाई कानुनी दायरामा ल्याउन २०७१ माघ २७ गते दुई आयोग गठन गरेको थियो ।