लन्डन । बेलायतको दक्षिण पूर्वी एक सानो शहर प्लमस्टिडस्थित खस समाज बेलायतले नेपाली पर्व उभौली तथा नयां वर्षको उपलक्ष्यमा एक कार्यक्रम गरेको छ । संयुक्त अधिराज्य (यूके) का लागि नेपाली राजदूत डा. दुर्गाबहादुर सुबेदीको प्रमुख आतिथ्यमा कार्यक्रम भएको हो ।
उक्त कार्यक्रममा राजदूतले १७ सयभन्दा बढि गीत रेकर्ड गराइसकेकी चर्चित गायिका श्रीमती मिरा राणालाई बेलायतवासी नेपालीको तर्फबाट सम्मानपत्र र दोसल्ला ओढाएर नागराज सम्मान २०१७ द्वारा सम्मान गरे ।
उक्त अवसरमा राजदूत सुबेदीले मिरा राणाजस्तो लोकप्रिय कलाकारलाई बेलायतवासी नेपालीका तर्फबाट सम्मान गर्न पाएकामा खुशी व्यक्त गरे । खस समाज यूकेले प्रत्यक वर्ष सामाजिक ख्यातिप्राप्त व्यक्ति, कलाकार एवं साहित्यकारहरुलाई नागराज सम्मानद्वारा सम्मान गर्दै आएको छ ।
सोही अवसरमा खस पुनर्जागरणका अभियन्ता, साहित्यकार तथा लेखक कृष्णबहादुर थापाद्वारा अंग्रेजीमा लेखिएको पुस्तक ‘The Poor, The Hopeless and The Ignorant Khas of Chaudabisa Dara’ अर्थात गरिवी, आशा मारेका र वेवास्ता गरिएका चौदबिसा दराका खसहरु नामक पुस्तकको प्रमुख अतिथि राजदूत सुबेदी र विशिष्ट अतिथि गायिका राणाले संयुक्तरुपमा विमोचन गरे ।
नेपालको सबै भन्दा प्राचिन जाती मतवाली खस भएपनि जनगणनामा उल्लेख नै नगरी अन्याय गरिएको जातिका बारेमा आफूले सात वर्ष लगाएर पुस्तक तयार पारेको लेखकले बताए ।
समाजका अध्यक्ष इन्द्रबहादुर कार्कीको सभापतित्वमा सम्पन्न भएको कार्यक्रममा खस समाजका उपाध्यक्ष सन्तोष कार्कीले स्वागत मन्तव्य दिएका थिए ।
कार्यक्रममा खस अन्तर्राष्ट्रिय समन्वय समाजका संयोजक टेकबहादुर थापा, सहसंयोजक राजेन्द्र खस, अन्तर्राष्ट्रिय कलाकार समाजका सचिव तथा कलाकार मनिष श्रेष्ठ र रेडियोकर्मी प्रमोदराज न्यौपाने, इनास यूके च्याप्टरकी अध्यक्ष रजनी सुनुवार, उपाध्यक्ष सुशील प्रजापति, महासचिव संजयभक्त कंडेल, कोषाध्यक्ष दिपक थापा, सदस्य अभि श्रेष्ठ लगायतको उपस्थिति थियो । कार्यक्रम समाजका महासचिव विकेश राज बस्नेत, कोषाध्यक्ष मन्जु भट्ट, चन्दा बस्नेतको सक्रियतामा सम्पन्न भएको समाजले जनाएको छ ।
