टनब्रिज फेस्टिवलमा प्रथम नाैमती बाजा गुल्मी पहिलो

लन्डन । लायन्स क्लव टनब्रिज र टनब्रिज काउन्सिलको संयुक्त आयोजनामा हरेक वर्ष हुने टनब्रीज कार्निभल फेस्टिवलमा प्रथम नौमती बाजा गुल्मी पहिलो भएको छ । करिब ६० भन्दा बढी अन्य कम्युनिटी समूह र विभिन्न ब्याण्डले आ-आफ्नो झाँकी र कला प्रदर्शन गरेको सो कार्निभल हेर्न हजारौं स्थानीयबासी भेला भएका थिए ।

टनब्रीज नेपाली कम्युनिटीका अध्यक्ष भूपू लेफ्टिनेन्ट रिटायर्ड मोहन रानाको नेतृत्वमा सचिव भेषबहादुर थापाले नेपाली समुदायलाई रयालीमा सहभागी गराउन सम्पूर्ण बन्दोबस्त मिलाएका थिए । नेपाली कम्युनिटीको अत्यन्त उत्साहजनक सहभागिताका निम्ति मेयर काउन्सिलर मार्क रोड्स र लायन प्रेसिडेण्ट बब बार्लेटले नेपालीहरूको खुलेरै प्रसंसा गर्नुका साथै सहभागीलाई धन्यवाद दिएका थिए । सो कम्युनिटीका अध्यक्ष रानाले गत २०१० देखि नेपाली कम्युनिटीले विशेषत स्थानीय बासीसंग समायोजन र नेपालको पर्यटन प्रवर्धनमा टेवा पुरयाउने मुख्य उद्देश्यले भाग लिँदै आएको बताए ।

प्रथम नौमती बाजा गुल्मी यूकेका प्रमुख संयोजक तथा गुल्मी जिल्ला समाज यूकेका संस्थापक अध्यक्ष एवं ग्रेटर रशमोर नेपाली कम्युनिटीका अध्यक्ष ओमप्रसाद थापाले प्रथम नौमती समूह जहाँ नेपाली छन् त्यहाँ पुगेर सहयोग गर्न प्रयासरत रहेको बताउंदै कार्निभलमा प्रथम स्थान पाउनुले बेलायतका नेपालीको शिर उच्च पारेको बताए ।

कार्यक्रम सफल बनाउन कार्यसमिति सदस्यहरु र पूर्व गोर्खाहरूको उत्साहजनक सहभागिता थियो । टनब्रिज नेपाली लेडिज कम्युनिटी अध्यक्ष श्रीमती तारा रानालगायत दिदी बहिनीहरु आफ्नो जातीय भेषभूषा झल्काउने पोसाकमा सजिएका थिए ।

कार्यक्रममा स्थानीयबासी गुल्मी जिल्ला समाज यूकेका निवर्तमान अध्यक्ष अर्जुन गौतम, वर्तमान उपाध्यक्ष टोप पल्ली, सचिव बीर बलालको सहभागिता थियो भने भार्सेली समाज यूकेका अध्यक्ष मेख गलामी, सचिव क्षत्र श्रीस, समाजसेवी दुर्गा बुढाथोकी लगायतको सक्रियता थियो ।