सिरियामा हवाई आक्रमण, ४० सर्वसाधारण मारिए

दमासकस, १४ असार । सिरियाको पूर्वी प्रान्त देइर अल जोउर प्रान्तमा भएको अमेरिकाआवद्ध हवाई आक्रमणमा कम्तीमा ४० सर्वसाधारणको मृत्यु भएको छ । राज्यद्वारा सञ्चालित समाचार समिति सानाले बुधबार सो जानकारी दिएको छ ।

सिरियामा सन् २०११ बाट सुरु भएको जनआन्दोलन केही समयपछि गृहयुद्धमा परिणत भयो । जारी सो द्वन्द्वमा परी हालसम्म ३ लाख २० हजारभन्दा बढी व्यक्तिको मृत्यु भइसकेको छ ।

उक्त द्वन्द्वका कारण लाखौँ व्यक्ति घाइते भएका छन् भने, लाखौले आफ्नो देशभित्र र विदेशमा शरणार्थी जीवन बितारहेका छन् ।

कारबाहीमा २४ आतङ्ककारी मारिए

काबुल, १४ असार । अफगान सुरक्षाबलले अफगानिस्तानको द्वन्द्वग्रस्त प्रान्तहरूमा गरेको कारबाहीको क्रममा कम्तीमा २४ आतङ्ककारी मारिएका र अन्य सात जना घाइते भएका अफगान गृह मन्त्रालयले बुधबार जानकारी दिएको छ ।

गत २४ घण्टाभित्र गरेको कारबाहीका क्रममा ती २४ आतङ्ककारी मारिनुका साथै अन्य सात घाइते भएका जारी विज्ञप्तिमा जानकारी दिइएको हो । सो कारबाहीको क्रममा अफगान सुरक्षाबललाई हवाइबलले समेत सहयोग गरेको बताइएको छ ।

अफगानिस्तानमा रहेको ३४ प्रान्तमध्ये १० वटामा सो कारबाही गरिएको थियो । यस कारबाहीको क्रममा सुरक्षातर्फ भने कुनै हताहती नभएको जनाइएको छ ।

अफगानिस्तानमा तालिवान र इस्लामिक स्टेट्स आतङ्ककारी समूहले अफगान सुरक्षाबललक्षित आक्रमणहरूमा सुरक्षाबलसहित सर्वसाधारणको ज्यान जाने क्रम जारी नै रहेको छ ।

यसैकारण अफगान सुरक्षाबलले पनि आफ्नो कारबाहीलाई भीषण बनाएको र यसमा उनीहरूले केही हदसम्म सफलता पनि पाएका छन् ।