एघार अर्बको भ्रष्टाचार दाबीसहित मुद्दा, इतिहासमै सबैभन्दा ठूलो भ्रष्टाचार

काठमाडौँ, २९ असार । अख्तियार दुरुपयोग अनुसन्धान आयोगले आन्तरिक राजश्व विभागका निलम्बित महानिर्देशक चूडामणि शर्मासहित तीन जनाविरुद्ध झण्डै रु ११ अर्ब भ्रष्टाचार गरेको अभियोगमा मुद्दा दर्ता गर्ने निर्णय गरेको छ ।

आयोगले कर फरछयोट आयोगका दुई सदस्य लुम्बध्वज महत र उमेश ढकाललाई पनि भ्रष्टाचारको अभियोगमा आज मुद्दा दर्ता गर्ने निर्णय गरेको हो । यो आयोगको इतिहासमै सबैभन्दा ठूलो भ्रष्टाचारसम्बन्धी विषय हो । आयोगका उच्च अधिकारीका अनुसार कर फछ्र्यौटसम्बन्धी ४५ फाइलको अध्ययन गर्दा रु १० अर्ब ९५ करोड भ्रष्टाचार भएको ठहरसहित शुक्रबार विशेष अदालतमा मुद्दा दर्ता गर्ने तयारी गरिएको हो ।

‘आयोगको निर्णयलगत्तै आजै मुद्दा दर्ता गर्ने तयारी गरिएको थियो तर समय अभावका कारण भोलि शुक्रबारका लागि सरेको छ’, आयोगका ती अधिकारीले भने, ‘हाल अध्ययन भइरहेको फाइलबाट झण्डै रु ११ अर्बको भ्रष्टाचार भएको देखिएको हो । अरु फाइल अध्ययन गर्दा थप भ्रष्टाचारको विवरण आउन सक्छ ।’

तत्कालीन कर फरछयोट आयोगका सदस्यद्वय महत र ढकाल भने हाल फरार छन् । आयोगले कर फरछयोटसम्बन्धी भएका निर्णयको समग्र पक्षको अध्ययन गरिरहेको छ ।