एनआरएनए आइसीसी अध्यक्ष शेष घले बेलायत आउंदै

लन्डन । एनआरएनए आइसीसी अध्यक्ष शेष घले बेलायत आउने भएका छन् । तमुधिं यूकेले गर्न लागेको ९ औं ‘नेपाली मेला’ मा आतिथ्य ग्रहण गर्न घले शनिबार बेलायत आउन लागेका हुन् ।

आइतबार २७ अगष्टमा केम्पटन पार्क रेस कोर्षमा नेपाली मेला हुंदैछ । घले तमुधिं यूकेका संरक्षक पनि हुन् । तमुधिं यूकेले उक्त अवसरमा बाढी पीडितका लागि संकलित रकम घलेलाई हस्तान्तरण गर्ने कार्यक्रम छ ।

यसैबीच, घलेको स्वागत तथा सम्मानमा एनआरएनए यूकेले सोमबार २८ अगष्ट दिउसो अल्डरसटस्थित एम्पायर हलमा एक कार्यक्रम गर्ने भएको छ । अध्यक्ष मुछेत्र गुरुङको आफ्नो कार्यकालमा केन्द्रिय अध्यक्षसंग सम्भवत यो अन्तिम सार्वजनिक हो ।

एनआरएनए यूकेको चुनाव नजिकिइरहेकै बेला घलेको आगमनलाई ‘अर्थपूर्ण’ मानिएको छ । घलेबाट कसले आर्शिवाद पाउने हुन् चासोको विषय छ ।