बेजिङस्टोकमा बलिहाङ तङनाम

 

 

लन्डन । बेजिङस्टोकवासी लिम्बु समुदायले गत सप्ताहन्त बलिहाङ तङनाम पर्व हर्षोल्लासका साथ मनाएका छन । २२ अक्टोबर २०१७ आइतबार ओकृज वेस्ट कम्युनिटी हलमा कार्यक्रम भएको हो ।

कार्यक्रममा नेपालबाट सांगीतिक यात्रामा यूके आएका गायक गायिकाहरु सुजन तिगेला लिम्बु, तारा थेबे र मनु नेम्बाङ को साथमा स्थानीय च्याब्रुङ टोलीले लारिङ्गेत नामलिङ्गेत खेलेर माहोल रोमाञ्चक बनाए । कार्यक्रमको बीच बीचमा च्याब्रुङ 
(केलाङ) नाच र हातमा हात समाउंदै लिम्बुहरु पालमको लयमा गाउंदा गाउंकै झझल्को दिइरहेको थियो ।

किरात याक्थुङ चुम्लुङ (केवाइसी) यूके बेजिङस्टोक शाखा अध्यक्ष श्रीमती अमृता पालुङवा सबेन्हीम लिम्बु, तीन जना कलाकार र केवाइसी यूके केन्द्रिय अध्यक्ष तिलविक्रम साम्बाहाम्फेबाट दीप 
प्रज्वलन गरि औपचारिक कार्यक्रम उद्घाटन गरिएको थियो ।

कार्यक्रममा तेह्रथुम समाज यूकेका अध्यक्ष सूर्य खापुङ, उनकी श्रीमती रिता खापुङ, सुवर्ण नेम्बाङ (गीतकार), केवाइसी यूकेका वरिष्ठ उपाध्यक्ष नगेन्द्र नेम्वाङ, केवाइसी यूकेका पूर्व अध्यक्ष सुबास जबेगु लगायतको उपस्थिति थियो ।
उपस्थित सबै अतिथी र नव आगन्तुक लिम्बु सदस्यहरु एवं जेष्ठ सदस्यहरुलाई खादा र सिलाम साक्पा लगाई स्वागत तथा सम्मान गरिएको थियो ।

औपचारिक कार्यक्रम सञ्चालन गर्दै शाखा उपाध्यक्ष पेपराज कुरुङबाङ लिम्बुले सुरक्षा सम्बन्धि जानकारी दिए भने स्वागत मन्तव्य शाखाका वरिष्ठ उपाध्यक्ष चन्द्र बेघाले राखेका थिए ।

शाखाका सल्लाहकार र निवर्तमान अध्यक्ष विजय लिङथेपद्वारा 
सञ्चालित दोश्रो चरणको कार्यक्रम सांगीतिक माहोलमा भएको थियो । उक्त अवसरमा गायक तिगेला, थेबे र नेम्बाङको गायनले सबैलाई नचायो । साथै चन्द्रकला लङवा लिम्बुको नृत्य पनि आकर्षक थियो ।

अन्त्यमा शाखा अध्यक्ष अमृत लिम्बुले कार्यक्रम सफल बनाउन प्रत्यक्ष अप्रत्यक्ष सहयोग गर्ने सबैलाई धन्यवाद दिइन् ।

बिहान ११ देखि शुरु कार्यक्रम राती ११ बजे समापन भएको थियो ।