हयारी र मेगानको बिहेमा गोर्खाहरुलाई विशेष आमन्त्रण

फोकस्टनस्थित रोयल गोर्खा राइफल्स, फस्ट बटालियनका अढाइ सय बढि सदस्यहरुलाई निम्ता गरिएको हो । राजकुमार हयारीले उक्त बटालियनसंग सन् २००७ मा अफगानिस्तानमा संगै काम गरेका थिए ।

बकिङहम प्यालेसका प्रवक्ताले राजकुमार हयारीका लागि उक्त युनिटले विशेष अर्थ राख्ने बताए । ‘राजकुमार हयारी र मर्केल आफ्नो बिवाह समारोहमा आर्म्ड फोर्सेसले विशेष भूमिका निर्वाह गर्ने भएकाले खुशी छन्’, ति प्रवक्ताले भनेका छन् । बिवाह समारोहमा २५० भन्दा बढि आर्म्ड फोर्सेस सदस्यहरुले ‘सेरेमोनियल ड्युटी’ गर्ने बताइएको छ । बिवाह स्थान विन्सोर क्यासल वरपर सडकमा गोर्खा र अन्य सैनिकहरु पंक्तिवद्ध रहनेछन् ।

राजकुमार हयारीले गोर्खाहरुसंग आफ्नो भावनात्मक सम्वन्ध रहेको बताउँदै आएका छन् । हयारीले केही समयअघि आफू गोर्खा भर्तीमा जान इच्छुक भएपनि समय नमिलेर त्यो अवसर गुमेको खुलासा गरेका थिए ।