बेलायतका युवालाई लोभ्याउंदै फर्किए तीन महिला कलाकार

लन्डन । बेलायतमा अचेल असंख्य हुन्छन् सांस्कृतिक कार्यक्रम । तर, गायिका प्रिती आले, मोडल तथा डान्सर रश्मी तामाङ र नायिका छुल्ठिम गुरुङ यहांको डायस्पोरामा विशेष 
सुःखद सम्झना छाडेर नेपाल फर्किए । ‘वुमन्स पावर’ थिममा नयां वर्ष शुभकामना सांझका लागि बेलायत आएका तीन महिला कलाकार करिब दश दिन लामो बेलायत टुरमा सांच्चिकै नारी शक्ति देखाउन सफल भए ।

अल्डरसट, उलवीच र साउथ हयारोमा उनीहरुले गरेको प्रस्तुति दर्शकले औधि रुचाए । फरक शैलीको दोहोरी ब्याटलका कारण पछिल्लो पटक चर्चामा रहेकी प्रितीले बेली डान्स र गायनले दर्शक मन बटुलिन् । कार्यक्रममा गायन, नृत्य र 
उद्घोषणको समेत जिम्मा लिएकी छुल्ठिम बोली र सौन्दर्यका कारण लोभलाग्दो आकर्षण बनिन् । रश्मीको नृत्य वान्स मोर भन्ने युवा पनि कम रहेनन् ।

‘अब लिड युवाले गर्नुपर्छ’, पहिलोपटक बेलायत आएकी मोडल, नायिका, निर्माता एवं भिजे छुल्ठिमले भनिन्, 
‘बेलायतको नेपाली डायस्पोरा ज्यादै सशक्त लाग्यो । नेपाली कलाकारको सम्मान, माया र आफ्नो कला संस्कृति जोगाउन सबै सचेत भएकाले हामी अझ उत्साहित भयौं ।’ उनले नेपाली कलाकारिताको दायरा निकै फराकिलो बनिरहंदा यसलाई विश्वव्यापी बनाउन आवश्यक रहेको पनि सुनाइन् ।

प्रिती र रश्मी त विगतमा पनि यूके आएका थिए । उनीहरु यो पटक पनि दर्शकको उस्तै साथ पाएर दंग थिए । ‘नेपाली नयां वर्षमा अनगिन्ती कार्यक्रम हुंदा पनि हामी तीन महिलालाई साथ दिएकामा एकदम कृतज्ञ छौं’, उनीहरुले भने ।

बेलायतमा कार्यक्रम गर्न निकै चुनौति छ । सप्ताहन्त कार्यक्रम जुधेर दर्शक हलसम्म तान्न प्राय आयोजकलाई सास्ती नै हुन्छ । तीन कलाकार बेलायत झिकाउने जोखिम एलबीजेड गुरुङ, हेम गुरुङ, ज्ञान गुरुङ लगायत युवाले लिएका थिए । कार्यक्रमलाई एनआरएनए यूके युवा विभागले पनि सहयोग गरेको थियो ।

आयोजकमध्ये एकजना एलबीजेड गुरुङ कार्यक्रमबाट मुनाफा कहिल्यै नसोचिएको बताउंछन् । ‘बेलायतको नेपाली समुदायमा नेपाली कला, संस्कृति जगेर्ना र नेपालका राष्ट्रिय कलाकार तथा नयां प्रतिभाहरुलाई प्लेटफर्म दिने हामीहरुको मुख्य उद्देश्य हो’, उनले भने ।

अन्तिम शोमा कलाकारहरुलाई विदाइ गर्दै एनआरएनए यूके उपाध्यक्ष प्रेम गाहामगर र महासचिव आर के त्रिपाठीले युवा कलाकार अनि नयां प्रतिभालाई संस्थाले सधैं प्रोत्साहित गर्ने 
प्रतिवद्धता व्यक्त गरे । कलाकारलाई राष्ट्रिय गहनाको विशेषण दिएर मात्र होइन, अवसर र प्रेरित पनि गर्न उनीहरुको जोड थियो ।

छुल्ठिम, प्रिती र रश्मीलाई निरमाया रोधीघर अल्डरसटमा पनि एक समारोहबीच विदाइ तथा सम्मान गरिएको थियो ।