दुई कोरियाबीचको शान्ति सम्झौता कार्यान्वयन सुरु

सोल, १८ वैशाख – दक्षिण कोरियाले दुई देशको सीमा क्षेत्रमा रहेको उत्तर कोरियाविरुद्ध प्रचार प्रसार गर्ने कार्यालय मङ्गलबारदेखि हटाएको छ ।

उक्त प्रचार संयन्त्रको कार्यालय सीमा क्षेत्रबाट हटाउने जानकारी दक्षिण कोरियाले सोमबार नै गराएको थियो । दक्षिण कोरियाको सैनिक स्रोतलाई उद्धृत गर्दै दिइएको समाचारमा सीमा क्षेत्रबाट उक्त कार्यालय मङ्गलबार हटाइएको बताइएको छ ।

उत्तर र दक्षिण कोरियाको सीमा क्षेत्रमा दक्षिण कोरियाले विगत लामो समयदेखि यस्तो प्रचार कार्यालय राखेर उत्तर कोरियाका बिरुद्ध प्रचार गर्दै आएको थियो । दक्षिण कोरियाको रक्षा मन्त्रालयले एक सैनिक समूह राखेर उत्तर कोरियाका विरुद्धमा प्रचार गर्ने गरेको थियो ।

उक्त क्षेत्रमा ठूलो आवाजका साथ माइक लगाएर उत्तरका विरुद्धमा दक्षिण कोरियातर्फका नागरिकलाई जानकारी दिने गरिएको थियो ।

गत शुक्रबार उत्तर र दक्षिण कोरियाबीच शान्ति सम्झौता भएको छ । सो सम्झौताअनुसार यी दुई देशले युद्ध अन्त्यको घोषणा गरी एक अर्का विरुद्ध प्रचारप्रसार नगर्ने जनाएका थिए ।

गत शुक्रबारको उक्त सम्झौताको पालना गर्दै दक्षिण कोरियाले उत्तरको सीमामा राखिएको उक्त प्रचार संयन्त्र हटाएको जनाएको हो । दक्षिण कोरियाको रक्षा मन्त्रालयले सो कुराको जानकारी दिएको छ ।

उत्तर र दक्षिण कोरियाको सीमा क्षेत्रमा रहेको र शान्तिग्रामका रुपमा चिनिएको पानमुनजोममा भएको सो शान्ति सम्झौताको पालना गर्ने पहिलो पहलस्वरूप सो संयन्त्र हटाउने निर्णय गरिएको हो ।

दुई कोरियाली उच्च नेताहरूबीच भएको यो सम्झौताले कोरियाली प्रायद्वीपमा शान्तिको पहल गर्ने देखिएको छ । यस कार्यालय हटाएपछि उत्तर कोरियाको तर्फबाट भने कुनै प्रतिक्रिया आएको छैन ।

यस सम्झौताले विशेषगरी कोरियाली युद्धका कारण छुट्टिएका परिवारबीच थप आशा जगाएको छ । उनीहरुमा पुनर्मिलन हुनसक्ने आशा दुई कोरियाबीचको यो पछिल्लो वार्ता र सम्झौताले थपेको छ ।

उत्तर कोरियाली नेता किम जोङ उनले आगामी दिनमा अणु अस्त्रको उत्पादन र जथाभावी परीक्षणको कार्य नगर्ने प्रतिबद्धता जनाएबाट पछिल्लो समयमा कोरियाली प्रायद्वीपमा ठूलो परिवर्तन आएको छ ।

उहाँको यो प्रतिबद्धताका कारण कोरियासँग वार्ता गर्न अरु देशहरु पनि इच्छुक भएका छन् । अमेरिकी राष्ट्रपति डोनाल्ड ट्रम्पले उत्तर कोरियाली नेता किम जोङ उनसँग भेट्ने बताउनुभएको छ ।

अमेरिकी राष्ट्रपति ट्रम्पले उत्तर कोरियासँग आगामी तीन वा चार हप्ताभित्र वार्ता गर्ने जानकारी हालैमात्र दिनुभएको थियो ।

उहाँले उत्तर कोरियाले अरु देशहरुसँग गरेका वार्ताहरु सकारात्मक मात्र नभएर महत्वपूर्णरुपमा अघि बढिरहेकाले नेता उनसँग आगामी केही हप्तामा अमेरिकाले पनि वार्ता गर्ने बताउनुभएको हो ।

उत्तर कोरियाको आणविक कार्यक्रम रोक्ने तयारी

सोल, १८ वैशाख – उत्तर र दक्षिण कोरियाबीच गतहप्ता भएको सहमति बमोजिम उत्तर कोरियाले आफ्नो देशभित्र हुदै आएको आणविक कार्यक्रम रोक्ने भएको छ ।

उत्तर कोरियाली अधिकारीहरुले आणविक उत्पादन र जथाभावी परीक्षणको कार्यक्रम रोक्ने तयारी गरिरहेको जानकारी एकजना उत्तर कोरियाली अधिकारीले दिएका छन् ।

दक्षिण कोरियाले दुई देशको सीमा क्षेत्रमा रहेको उत्तर कोरियाविरुद्ध प्रचार प्रसार गर्ने कार्यालय मङ्गलबारदेखि हटाएको समाचार आएको छ । यस समाचारपछि उत्तर कोरियालाई पनि आणविक कार्यक्रम रोक्ने दवाव परेको हुनुपर्ने दक्षिण कोरियाली एक अधिकारीले बताए ।

ती अधिकारीले भने– ‘दुई कोरियाबीचको उक्त शान्ति सम्झौताको कार्यान्वयनको काम दक्षिण कोरियाले सुरु गरिसकेकोले अब छिट्टै उत्तरले पनि सो कार्य गर्नुपर्दछ ।’

गत शुक्रबार भएको दक्षिण कोरियाली राष्ट्रपति मुन जाय इन र उत्तर कोरियाका नेता किम जोङ उनबीचको वार्ताका क्रममा पनि उत्तर कोरियाली नेता उनले आणविक कार्यक्रम रोक्ने जानकारी दिनुभएको थियो ।

उत्तर कोरियाली नेता उनले मे महिनामा आणविक कार्यक्रम रोकिने र यस कार्यक्रमको पर्यवेक्षणका लागि अमेरिकी विज्ञलाई समेत आमन्त्रण गरिने बताउनुभएको थियो ।

उत्तर कोरियाली एक अधिकारीले भने– ‘आणविक कार्यक्रम रोक्ने बारेमा तयारी भइरहेको छ र केही दिनमा यस विषयमा सार्वजनिक रुपमा नै जानकारी गराइने छ ।’