बेलायतका पत्रकारहरु चुनावी मैदानमा, पद थोरै, आकांक्षी धेरै

लन्डन । नेपाल पत्रकार महासंघ बेलायत शाखाको नयां नेतृत्वका लागि आइतबार उम्मेदवारी दर्ता कार्यक्रम भएको छ । १९ मेमा अल्डरसटमा हुने निर्वाचनका लागि साताअघि मनोनयन गरिएको हो ।

लन्डनस्थित एभरेष्ट ल सोलिसिटर्स कार्यालयमा बिहान १० देखि दिउसो २ बजेसम्म भएको मनोनयन दर्तामा आवश्यक पद भन्दा बढिले उम्मेदवारी दर्ता गराएपछि निर्वाचन नै हुने सम्भावना बढेको छ । तर, निर्वाचन समितिले उम्मेदवारहरुको अन्तिम नामावली बिहीबार सांझ ८ बजेमात्र प्रकाशित गर्ने जनाएको छ । उम्मेदवारीमाथि दावी विरोध र केही जटिलता आएपछि केन्द्रिय पदाधिकारीहरुको रोहबरमा बिहीबार समस्या सल्टाइने अपेक्षा छ ।

शाखाको अध्यक्ष पदका लागि वर्तमान अध्यक्ष नरेश खपांगीमगर र उपाध्यक्ष ध्रुवराज अर्यालको उम्मेदवारी दर्ता भएको छ भने वरिष्ठ उपाध्यक्षमा श्याम लुईंटेल र दिनेशकुमार परियार एवं उपाध्यक्षमा खेमराज रानाभाट र लिलामान शेरपुन्जाले उम्मेदवारी दर्ता गराएका छन् ।

महासचिवमा एक पद चाहिनेमा सबैभन्दा बढि चार जनाले दर्ता गराए जसमा नरेन्द्र क्षेत्री (बस्नेत), सञ्जयभक्त कंडेल, विमला सेने र खुशी लिम्बु छन् । सचिवमा शिव भन्डारी र जगननाथ कार्कीले उम्मेदवारी दर्ता गराए । त्यसैगरि, कोषाध्यक्षमा पूर्णबहादुर गुरुङ र सिद्धार्थविक्रम क्षेत्रीको उम्मेदवारी परेको निर्वाचन समितिले जनाएको छ । सह-कोषाध्यक्षमा रोशन राई ‘विनोद’ को मात्रै उम्मेदवारी परेपछि उनी निर्विरोध भए ।

सदस्यहरुमा ८ पदका लागि ९ जनाले उम्मेदवारी दिएका छन् जसमा बोमबहादुर थापा, नरेश काङमाङ राई, सुरेन्द्र 
इङ्नाम, तिर्थबहादुर मल्ल, गणेश खड्का, मन्जु भन्डारी खरेल, विश्वासदीप लिम्बु (तिगेला), नरेन्द्रराज नेम्वाङ र जीवन सेन छन् ।

यसपटक शाखाको वैदेशिक नियमावली विपरित 
पदाधिकारीमा उम्मेदवारी दिने नयां सदस्यहरु पनि उल्लेख्य छन् ।