बेलायतको जनसंख्या छ करोड ६० लाख नाघ्यो, वृद्धिदर भने न्यून

लण्डन, १४ असार – बेलायतको जनसंख्या छ करोड ६० लाख नाघेको तथ्य औपचारिक रुपमा बिहीबार सार्वजनिक गरिएको छ ।
राष्ट्रिय तथ्यांक कार्यालयले सार्वजनिक गरेको तथ्याङ्क अनुसार सन् २०१७ को जुन अन्त्य देखि अहिले सम्ममा तीन लाख ९२ हजार जनसङ्ख्या थपिएको छ ।

इङ्ल्याण्ड, स्कटल्याण्ड, वेल्स र उत्तरी आयरल्याण्डबाट थपिएका ती व्यक्तिहरूसहित अहिले बेलायतको कुल जनसंख्या छ करोड ६० लाख ४० हजार २२९ पुगेको छ । पहिला र अहिलेको जनसङ्ख्याको तुलना गरेर हेर्दा कुल जनसंख्या वृद्धिदर भने ०.६ प्रतिशत मात्रै रहेको छ । यो वृद्धिदर सन् २००४ को मध्यदेखि अहिले सम्मकै सवैभन्दा कम रहेको बताइएको छ ।

सन् २०१६ को जुन अन्त्यसम्ममा बेलायतको जनसङ्ख्या पाँच लाख ३८ हजार वृद्धि भएको थियो जुन सन् १९४८ देखिकै सवैभन्दा धेरै वृद्धि थियो ।

अहिले वृद्धि भएको मध्ये ४१ प्रतिशत प्राकृतिक वृद्धि हो । जन्मेकाको संख्याबाट मृत्यु भएकाहरूको सङ्ख्या घटाउन देखिने वृद्धिलाई प्राकृतिक वृद्धि भनिन्छ । त्यसबाहेक अरु ५९ प्रतिशत भने बसाईसराइका कारण बृद्धि भएको तथ्याङ्कले देखाएको छ ।

सन् २०१७ को मध्यसम्म पाँच लाख ७२ हजार जना बसाइसराइ गरेका थिए । सोही अवधिमा ३४ हजार दुई सय जनाले मुलुक छाडेका थिए । जबकि अघिल्लो बर्ष सोही अवधिमा २८ हजार जना देशबाट बाहिरिएका थिए ।

देश भित्रिने र देश छाड्नेहरूको जनसंख्याका आधारमा हेर्दा आप्रवासीहरूको जनसङ्ख्या नौ प्रतिशतले वृद्धि भएको छ ।
जनसङ्ख्या वृद्धि र बसाइँसराइको तथ्याङ्क यस्तो हुनुमा यूरोपेली यूनियनबाट बेलायत बाहिरिनु नै मुख्य कारण भएको कार्यालयले जनाएको छ ।

बेलायतमा बसाइँ सर्नेहरूमध्ये सवैभन्दा धेरै रोमानियाली छन् । उनीहरूको संख्या ५० हजार छ । त्यसपछि चीन, भारत, फ्रान्स र पोल्याण्डका पनि धेरै आप्रवासी बेलायतमा बसोबास गर्छन् ।