लन्डन । बेलायती रक्षा राज्यमन्त्री मार्क ल्यानकास्टर मंगलबार सांझ नेपाल प्रस्थान गर्ने तय भएको छ । भूतपूर्व गोर्खा समस्या समाधानको ‘प्याकेज’ लिएर उनी नेपाल जान लागेका हुन् । ब्रेक्जिट व्यस्तताले गर्दा उनी काठमाडौंमा तीन दिनमात्र रहने लन्डनस्थित नेपाली दूतावास श्रोतले जनाएको छ ।
गोर्खा एजेन्डा एवं बेलायत नेपाल सम्वन्ध अभिवृद्धिका लागि हुन लागेको उनको भ्रमणलाई विशेष महत्वका साथ हेरिएको छ । एक जमाना गोर्खा ब्रिगेडमा समेत कार्यरत ल्यानकास्टरले लामो समयदेखि गोर्खा मुद्दा हेर्दै आएका छन् ।
नेपाल भ्रमणका सिलसिलामा उनले राष्ट्रपति, प्रधानमन्त्री, मन्त्री लगायत राजनीतिज्ञहरुसंग भेटघाट गर्ने कार्यक्रम छ ।
बेलायत र नेपाल सरकार एवं भूपू गोर्खा प्रतिनिधिबीच गठित प्राविधिक समितिले कयौं वार्तापछि दुवै सरकारलाई प्रतिवेदन बुझाएको झण्डै वर्ष दिन हुंदा समेत केही प्रगति नभएकोमा भूपू गोर्खाहरुले असन्तुष्टि जनाउंदै आएका छन् । गोर्खा सत्याग्रह संयुक्त संघर्ष समितिले आफ्ना माग वेवास्ता गरिए पुनः आन्दोलन गर्ने चेतावनी दिइसकेको छ ।
