४९ दिनसम्म पनि देखियो कोरोना !

एजेन्सी । समान्यतया कोरोना भाइरस संक्रमितहरु १४ दिनमा निको भई घर फर्किदै आएका छन् तर चीनमा एक व्यक्तिमा कोरोना भाइरसको संक्रमण ४९ औं दिनसम्म रहेको पाइएको छ ।

ती व्यक्ति संक्रमितको सम्पर्कमा आएको १७ औं दिनमा पहिलोपटक परीक्षण गर्दा कोभिड–१९ पोजिटिभ पाइएको थियो । त्यसपछि क्रमश २२, २६, ३०, ३४, ३९, ४३ र ४९ औं दिनमा परीक्षण गर्दा समेत पोजिटिभ देखियो । ४७ औं दिनको परीक्षणमा भने नेगेटिभ देखियो ।
संक्रमित भएको २० औं दिनमा कोरोना भाइरसबाट मुक्त हुँदै आएको भनिए पनि कतिपयमा सोको दोब्बर समयमा पनि संक्रमण कायम नै रहेको पाइएको नेचुरल न्युजले आफ्नो अनलाइन संस्करणमा जनाएको छ ।
यसअघि कोरोनाभाइरसबाट सबैभन्दा लामो संक्रमण अवधि ३७ दिन रहेको थियो ।
समाचारमा उल्लेख गरिएअनुसार संक्रमितमा हल्का लक्षण मात्रै देखा पर्यो । फोक्सोमा देखा परेको संक्रमण अस्पताल पुग्दापुग्दै हराउन गयो ।
डालेनको चोङकिङस्थित आर्मी मेडिकल विश्वविद्यालय र वुहानस्थित पीएलए केन्द्रीय थिएटर कमाण्डका अनुसन्धानकर्ताले संक्रमित व्यक्तिमा कोरोना भाइरसले पाहुना भाइरससँग सहजीवी सम्बन्ध (सिम्बायोटिक रिलेशन) बनाएको हुनसक्ने तर्क गरेका छन् । यस्तो सम्बन्धमा दुवै एक अर्काको उपस्थितिले फाइदाजनक अवस्थामा पुग्छन् ।
यी तथ्यहरुले वुहानमा उत्पत्ति भएको कोरोनाभाइरसको नयाँ सह प्रकार खुलेको तर्क गरिएको छ । यस प्रकारको संक्रमण छिट्टै सर्ने नदेखिए पनि उन्मूलन हुन समय लाग्ने जनाइएको छ ।
स्वास्थ्य अवस्था कमजोर हुने बिरामीमा यस प्रकारको संक्रमण फैलिए उपचारको आवश्यकता समेत देखिने छैन् । किनभने यस्तो संक्रमितमा लक्षण सहजै देखिन्न । यद्दपि उसले संक्रमण सारेको हुनसक्छ । जसले नयाँ प्रकारको प्रकोपको सृजना गर्नेछन् ।
यस्तो संक्रमण विश्वका अन्य भागमा पुगे नपुगेको अझै स्पष्ट भइसकेको छैन् । तर हल्का लक्षण देखिने वा लक्षण नै नदेखिएको बिरामीको तथ्याङ्क भने विश्वब्यापी रुपमा नै संकलन गरिँदैछ । भारतमा करिब ५० प्रतिशत बिरामीमा त सामान्य लक्षण समेत नदेखिएको भारतीय सञ्चारमाध्यमहरुले स्वास्थ्य अधिकारी र अनुसन्धानकर्ताहरुलाई उद्धृत गर्दै उल्लेख गर्दै आएका छन् । नेपालमा समेत यात्रा वृत्तान्तको आधारमा ४० दिनपछि समेत संक्रमणको पुष्टि भएको फेला परेको छ । यस प्रकारको संक्रमणबाट जोगिन संक्रमणबाट मुक्त भएका व्यक्तिको रगत आवश्यक हुने औंल्याइएको छ ।
व्यक्तिमा नौ पटक परीक्षण गरिएकोमा आठ पटक संक्रमणको पुष्टि भएको थियो । चिनियाँ अनुसन्धानकर्ताका अनुसार लामो समयसम्म संक्रमण रहने बिरामीले सारेको भाइरसको प्रकृत्ति र बिरामीको स्वास्थ्य अवस्था अझै जटिल हुनेछ । यद्दपी यसप्रकारको भाइरसको सार्न सक्ने क्षमता अझै स्पष्ट भइसकेको छैन् ।