कोरोनाको कारण युकेका नेपाली ट्राभल एजेन्सीहरु संकटमा

बेलायतमा समर लाग्दै गर्दा यो यहाँका नेपालीहरुका लागि नेपाल जाने समय आउन लागेकाे छ । बच्चाहरुको विद्यालय र शिक्षण संस्थामा विदाका कारण धेरैजसो यसबेलामा यात्रा गर्छन् । तर कोरोनाले विश्वका धेरै देश लकडाउनमा हुँदा टिकट लिइसकेका यात्रुहरु पनि अलमलमा छन् । ‘मैले छोराको व्रतबन्ध गर्न परिवारसहित कतार एयरवेजमा टिकट लिएको थिएँ । कोरोनाका कारण हवाईयातायात ठप्प भयो’, एक जना नेपाली यात्रुले वीनेपालीसँग भने ।  ‘अब के हुन्छ थाहा  छैन । मैले टिकट काटेको ट्राभल वर्ल्डलाई टिकटका बारेमा सोधपुछ गर्दा कतार एयरवेजसँग सम्पर्क गर्न भनेको छ । बुधबार पैसा फिर्ताका लागि अनलाईन फारम भरेको छु ।’