लण्डन । बेलायतबाट नेपाल फर्कन चाहने नेपाली नागरिकहरुलाई आफ्नो विवरण उपलब्ध गराउन बेलायतस्थित नेपाली दुताबासले आह्वान गरेको छ ।
दुताबासले आज एक सूचना प्रकाशित गरी नेपाल सरकारको मन्त्री परिषद्को निर्णयबमोजिम नेपाल जान चाहनेहरुलाई प्राथमिकताका आधारमा नेपाल फर्काइन लागेको बताइएको छ ।
दुताबासले नेपाल फर्कन चाहनेहरुले आफ्नो नाम, राहदानी नम्बर, स्थायी ठेगाना, नेपाल फर्केपछि बस्ने ठेगाना, नेपालको टेलिफोन सम्पर्क, आफ्नै खर्चमा तोकिएको होटल क्वारेन्टिन वा स्थानीय तहले व्यवस्थापन गरेको क्वारेन्टिन कुनमा बस्ने हो खुलाउने,नेपाल फर्कनु पर्ने कारण, हाल आफू रहेको ठेगाना, सम्पर्क नम्बर र इमेल आदि उपलब्ध गराउन अनुरोध गरेको छ ।
त्यस्तो विवरण दुताबासको फेसबुक पेज, ट्वीटर, इमेलमार्फत पठाउन सकिने बताइएको छ ।
