गैरआवासीय नेपाली र कूटनीतिक नियोगका कर्मचारीलाई अनअराइभल भिसा

काठमाडौँ । सरकारले गैरआवासीय नेपाली तथा कूटनीतिक नियोगका कर्मचारीलाई त्रिभुवन अन्तर्राष्ट्रिय विमानस्थलमा अनअराइभल भिसा दिने भएको छ । तर नयाँ भाइरसको भेरियन्ट देखिएको मुलुक बेलायतबाट नेपाल यात्रा गर्नेहरुले भने बेलायतस्थित नेपाली दुताबासबाट भिसा लिएर मात्र यात्रा गर्नुपर्नेछ ।

अध्यागमन विभागले गत मङ्सिर १०, पुस १० र यही माघ १० गते बसेको मन्त्रिपरिषद् बैठकको निर्णयअनुसार अनअराइभल भिसा खुला गरिएको विभागले जनाएको छ ।

विभागले आइतबार सूचना प्रकाशन गर्दै नेपाली मूलका विदेशी (राहदानीमा जन्मस्थान नेपाल उल्लेख भएको) वा नेपालीसँग नाता सम्बन्ध भएका वा गैरआवासीय नेपाली, कूटनीतिक तथा औपचारिक राहदानीवाहक, युएनका कर्मचारी, नेपालमा रहेका अन्तर्राष्ट्रिय संस्थामा कार्यरत विदेशी कर्मचारीलाई विनाशर्त अनअराइभल भिसा खुला गरिएको जनाएको हो ।

विभागले नेपालको भिसा भएका विदेशी नागरिकलाई आगमन अनुमति भने दिइने जनाएको छ भने नेपालको भिसा नभएका विदेशीले विदेशस्थित नेपाली नियोगबाट भिसा लिएरमात्र नेपाल आउन पाउनेछन् ।

विदेशी नागरिकलाई पूर्वस्वीकृति विना स्थलमार्गबाट नेपाल प्रवेशको अनुमति दिइएको छैन । सबै विदेशीले यात्रा शुरु गर्नुभन्दा बढीमा ७२ घण्टाको पिसिआर परीक्षणको नेगेटिभ रिपोर्ट र दश दिनको क्वारेन्टिन अनिवार्य रहेको छ । यसअघि सम्बन्धित मुलुकमा रहेका नेपाली नियोगबाट पूर्वस्वीकृति लिएर आएकालाई मात्र अनअराइभल भिसा दिने गरिएको थियो ।

बेलायतबाट नेपाल जाने यात्रुहरुको हकमा भने उनीहरुले बेलायतस्थित नेपाल दुताबासबाट भिसा प्राप्त गरेपछि मात्र नेपाल जान पाउने छन् । सरकारले अहिले दिन थालेको अनअराइभल भिसा र गैरआवासीय नेपालीको सुविधा बेलायतबासी नेपालीहरुलाई भने उपलब्ध छैन । बेलायतमा कोरोना भाइरसको नयाँ भेरियन्ट देखिएका कारण सो प्रावधान राखिएको हो ।

बेलायतबाट नेपाल यात्रा गर्नुपूर्व लण्डनमा रहेको नेपाली दुताबासमा पासपोर्ट पठाएर भिसा लिनु पर्ने हुन्छ । तर भिसाका लागि फाराम भने अनलाइनमै भर्न मिल्छ ।