बेलायतको चर्चित टोटनम फुटबल क्लवबाट खेल्दै पूर्व गोरखाकी छोरी

लण्डन । पूर्व गोरखा सैनिककी छोरी अस्मिता आले बेलायतको एक ठूलो फुटबल क्लव टोटनमबाट खेल्ने भएकी छिन् ।

रक्षा पंक्तिमा रहेर खेल्ने आलेले शुक्रबार टोटनम फुटबल क्लवसित सन् २०२३ सम्मको लागि सम्झौता गरेकी छिन् ।

१९ वर्षीया उनले टोटनम महिला फुटबल टीमकी मुख्य टीमबाट खेल्नेछिन् । उनको जर्सी नम्बर १३ रहेको छ ।

यसअघि आस्टोन भिल्ला फुटबल क्लवबाट उनले फुटबल खेल्ने गरेकी थिइन् । व्यावसायिक फुटबल खेल शुरु गरेको छोटो समयमा नै उनले खेलमा महत्वपूर्ण प्रगति गरेकी थिइन जसका कारण गतवर्ष उनलाई प्लेयर्स प्लेयर अफ दी सिजन उपाधि पनि दिइएको थियो ।

टोट्टनहमसित सम्झौता गरेपछि उनले भनेकी छिन्, “टोटनहमजस्तो प्रख्यात फुटबल क्लवसँग जोडिन पाएकोमा म असाध्यै खुशी छु । रिहान (क्लवकी मुख्य प्रशिक्षक), क्लवका कर्मचारी र खेलाडीहरुसित मैले चाहेको जस्तै आकांक्षा पाएँ । म रिहानसित फेरि काम गर्न पाउने आशा गर्छु र सकेसम्म सिक्नेछु । खेल्न शुरु गर्न म आतुर छु र आशा छ म टीमलाई राम्रो बनाउन सहयोग गर्न सक्नेछु ।”

क्लवकी मुख्य प्रशिक्षक रिहान स्कीनरले अस्मिता प्रभावशाली युवा खेलाडी भएको र उनले बितेको केही वर्षमै वुमन सुपरलिग र युवा अन्तर्राष्ट्रिय टीममा महत्वपूर्ण प्रगति गरेको बताइन् । ”उनलाई आफ्नो टीममा राख्न पाउँदा म उत्साहित छु र उनीसित ठूलो सम्भावना छ जुन उनले गत सिजनमा नै लिगमा देखाइसकेकी छिन् । अस्मिताले बलियो रक्षा पंक्तिका साथै खेल मैदानका आक्रामक क्षेत्रहरुमा पुग्नसक्ने क्षमता लिएर आएकी छिन जसले टीमलाई बलियो बनाउनेछ” उनले भनेकी छिन् ।

अस्मिताका पिता अमृतका अनुसार अस्मितालाई गत सिजनको लिग विजेता चेल्सी र म्यानचेष्टर सिटीबाट पनि प्रस्ताव आएको थियो । तर अस्मिताले आफ्नो खेल सीपको विकासका लागि टोट्टनहम नै रोजेको बताए । जसका पछाडि टोटनमकी मुख्य प्रशिक्षक रिहानसित अस्मिताले पहिले पनि इङल्याण्डको अण्डर १९ महिला टीममा काम गरिसकेको एक कारण भएको उनले थपे । ”आस्टोन भिल्लामा करार सम्झौता सकिए पनि नयाँ सम्झौताको लागि अफर आएको थियो तर आफ्नो सीप विकास गर्न टोटनम उचित क्लव भएको छोरीले निस्कर्ष निकालिन्” उनले भने ।

आस्टोन भिल्ला र टोट्नमको आपसी लेनदेन मिलाउन समय लागेका कारण उनले शुक्रबार मात्र सम्झौता गरेकी हुन् । उनी टोट्नमसित करिब एक महिनादेखि तालिममा छिन् ।

उनले इङल्याण्डको महिला फुटबल तर्फको सबैभन्दा माथिल्लो लिग वुमन सुपर लिगमा आस्टोन भिल्ला क्लवबाट दुई वर्ष खेलिसकेकी छिन् । साथै इङल्याण्डको अण्डर १९ महिला राष्ट्रिय टीममा पनि उनी आवद्ध छिन् । उनको लक्ष्य इङल्याण्डको राष्ट्रिय महिला टीमबाट खेल्ने रहेको छ ।

तनहुँ दमौली पुर्ख्यौली घर भएकी अस्मिताका पिता पूर्व गोरखा सैनिक हुन् । उनी नेपालको राष्ट्रिय स्क्वास खेलाडी पनि हुन् । हाल अस्मिता आमा बसन्ती, बाबा अमृत र दाजु असिमसहित युकेको ननिटनमा बस्दै आएकी छिन् । अस्मिताका दाइ पनि फुटबल खेलाडी हुन् ।

 अस्मिताका बारेमा थप सामग्री

इ‌ङ्ल्याण्डको वुमन अन्डर १६ फुटबल टीममा छानिइन् अस्मिता आले

https://www.wenepali.com/2017/01/29170.html

इङल्याण्डको महिला फुटबलमा उदाउँदी नेपाली छोरी

https://www.wenepali.com/2021/05/78201.html

इंग्ल्याण्डको स्कुलस्तरीय इन्टरन्याशनल छात्रा फुटबल टोलीमा गोरखा सैनिककी छोरी

https://www.wenepali.com/2016/02/17397.html