लकडाउनपछि पहिलोपटक नेपाली कलाकारहरु बेलायत आइपुगे

लन्डन । बेलायतमा कोभिड १९ को महामारीपछि नेपालबाट कलाकार झिकाएर हुने साँस्कृतिक कार्यक्रम करिब ठप्प भएको अवस्थामा पहिलोपटक चर्चित कलाकारहरु प्रस्तुतिका लागि बेलायत आइपुगेका छन् ।

यही शुक्रबार साँझ अल्डरसटको एम्पायर हलमा हुने एचके नाइट २०२१ का लागि गायकहरु राजु लामा, सञ्जीव प्रधान र शरिष्मा अमात्य लन्डन आइपुगेका छन् ।

सोमबार साँझ लन्डन हिथ्रो विमानस्थलको टर्मिनल ५ मा उत्रिएका उनीहरुलाई एचके नाइटका आयोजकहरुले स्वागत गरेका थिए । आयोजकहरुमा हङकङ युथ नेप्लिज एशोसिएसन युकेका अध्यक्ष सुवास घोतानेका साथमा राजन गुरुङ, हेम गुरुङ, अजय श्रेष्ठ, मिका, पप्पु, आशिष, सुदिप, सुबाससहित सो समूहका दुई दर्जन सदस्य गायकहरुको स्वागतका लागि विमानस्थल पुगेका थिए ।

कार्यक्रमको प्रमुख प्रायोजक वाटरमेलन मोर्गेजेजका निर्देशक किरण गुरुङ पनि कलाकार स्वागतका लागि हिथ्रो गएका थिए ।

आयोजक समूहका अध्यक्ष सुवास घोतानेले गायक गायिकाहरुलाई पुष्पगुच्छा र खादासहित स्वागत गरेका थिए ।

लन्डन उत्रिएलगत्तै दुवै गायकहरुले पनि शुक्रबार हुने एचके नाइटमा सहभागी हुन बेलायतवासी नेपालीहरुलाई निम्तो दिएका छन् ।

कार्यक्रममा नेपालबाट आएका कलाकारका साथमा बेलायतस्थित कलाकार आइएम गोले, दाजुभाइ ब्याण्ड र सिक्का ब्याण्डको विशेष प्रस्तुति रहनेछ । कार्यक्रम सञ्चालन मिस इंग्ल्याण्ड रनर अप प्रतिष्ठा रावत र मिस यूके नेपाल २०१७ सिर्जना गुरुङले गर्नेछन् ।

कार्यक्रमको हरेक टिकटमा वाटरमेलन मोर्गेजेजको सेवाशुल्कमा २५ प्रतिशतको छुट समावेश छ । टिकट प्रायोजक मःम स्टेसनले पनि हरेक टिकटलाई आफ्नो रेष्टुरेन्टमा १० प्रतिशत छुट उपलब्ध गराउनेछ ।

कोभिड महामारीयता नेपालका चर्चित कलाकारहरुको साथमा बेलायतमा साँगीतिक प्रस्तुति हन लागेको यो पहिलो अवसर हो । बेलायतवासी नेपाली दर्शकहरुको लामो प्रतिक्षापछि हुन लागेको कार्यक्रमलाई विशुद्ध सांगीतिक र मनोरञ्जनात्मक बनाइने आयोजकले बताएका छन् ।