लण्डन । करिब दुई वर्ष कोरोना महामारीकै बीच बित्यो । कहिले बेलायतमा लकडाउन कहिले नेपालमा । अत्यावश्यक कार्यमा पनि आवतजावत निक्कै नै सकसपूर्ण थियो । त्यसमाथि सार्वजनिक कार्यक्रम गर्न त कानुनी रुपमै बन्देज थियो । अहिले नेपाल तथा बेलायत दुवै देशमा कोरोना महामारी अलि बिसेक भएको छ । आवागमनमा बाध्यात्मक प्रावधानहरु हटेका छन् । सार्वजनिक कार्यक्रम गर्न पनि रोकतोक छैन । यही अनुकूलतालाई मौका छोप्दै बेलायतका नेपाली स्रष्टाहरु एक पछि अर्को गर्दै कृति पस्कँदै छन् ।
विगतमा कविता, नियात्रा, कथा संग्रह निकालिसकेका स्रष्टा दयाकृष्ण राईको ‘अश्वेत महावाणी’ कविता संग्रह बुधबार साहित्यकार बैरागी काइँलाबाट विमोचन हुँदैछ । नेपाली प्रतिभा प्रतिष्ठान बेलायतले उनको कृति प्रकाशन गरेको छ ।
यसैगरी, शुक्रबार मात्र गीतकार कल्पना आङबुहाङको ‘मेरी आमा’ जीवनोपन्यास र ‘नरुनु आमा’ गीत संग्रहको काठमाडौँमा लोकार्पण सम्पन्न भएको छ । उनको यसअघि दुई गीति क्यासेट प्रकाशन भएको थियो ।
अघिल्लो साता (चैत ४ गते) टेम्के भोजपुरमा साहित्यकार नरेश काङमाङ राईको ‘तेप्लायु’ कविता संग्रह विमोचन भएको थियो । प्रगतिशील साहित्यकार खगेन्द्र संग्रौलाले उनको कृतिको विमोचन गरेका थिए । राईको यसअघि उपन्यास, कविता लगायतको थुप्रै कृति प्रकाशन भइसकेको छ ।
यसअघि फागुनको तेस्रो साता (२० गते) बेलायतका अर्का सर्जक विजय हितान मगरको ‘मगर रिन्हाक’ (मगर जागरण) पुस्तक सार्वजनिक भएको थियो । उनको पुस्तकको आदिवासी जनजाति आयोगका सदस्य डा. मीन श्रीशले विमोचन गरेका थिए । हितान पर्यावरणका बारेमा लेख्न रुचाउँछन् ।
यसैगरी, लीला सेलिङ माबोले लकडाउनका बेला एउटा महिलाको सोचाइ र भोगाइलाई समेटेर अंग्रेजीमा ‘मेम्वाइर्स अफ अ गोरखा वाइफ ड्युरिङ लकडाउन’ नामक आत्मवृतान्तले भरिएको कृति प्रकाशन गरेकी छिन् । उनको यो पुस्तक अथर हाउसले प्रकाशन गरेको छ ।
यस्तै, साहित्यकार विश्वासदीप तिगेलाको गैरआख्यानमूलक ‘ह्वाई चाइना इज नट रिप्लेसिङ अमेरिका’ कृति पनि यसै साल प्रकाशन भएको छ । उनको कृतिमा विश्व व्यवस्थालाई आफ्नो पकडमा राख्न चीन र अमेरिकाको होडलाई विश्लेषण गरिएको छ ।
