एनआरएनए युकेले केन्द्रसित समझदारी गरेर मात्र सदस्यता शुल्क बुझाउने

लण्डन । गैरआवासीय नेपाली संघ (एनआरएनए) बेलायतले अन्तर्राष्ट्रिय समन्वय समितिसित सम्झौता गरेर मात्र सदस्यतावापत उठाएको शुल्क पठाउने निर्णय गरेको छ ।

एनआरएनए युकेको आइतबार बसेको कार्यसमितिको बैठकले सो निर्णय गरेको हो । एमओयुका बारेमा अन्तर्राष्ट्रिय समन्वय समितिलाई पत्राचार गर्दा पनि चासो नदेखाएको हुनाले यसबारेमा पुन पत्राचार गर्ने निर्णय एनआरएनए युकेले गरेको छ । साथै एनआरएनए यूकेले नेपाल हाउस निर्माण वा खरिद गर्ने प्रकृया सुरु गरिसकेकोले यसपटकका लागि सदस्यता शुल्क मिनाहा गरिदिन अन्तर्राष्ट्रिय समन्वय परिषदलाई अनुरोध गर्ने निर्णय गरेको छ ।

अध्यक्ष प्रेम गाहा मगरको अध्यक्षता र महासचिव खुशी लिम्बुले सन्चालन गरेको सो बैठक एनआरएनए युकेको कार्यालयमा बसेको थियो ।

बैठकले एनआरएनए यूकेले बिभिन्न व्यक्ति वा संस्थाहरुलाई तिर्न बाँकी रहेका बिलहरु भुक्तानी गर्न कोषाध्यक्ष विष्णु खरेललाई निर्देशन दिएको छ ।

यस्तै, एनआरएनए यूकेले हाल बेलायत भ्रमणमा रहेका डा. महावीर पुनसंग आगामी ३ जुन २०२२ तारिखका दिनमा एक अन्तरकृया गर्ने भएको छ । कार्यक्रमको संयोजनको जिम्मेवारी उपाध्यक्ष गोविन्द खरेललाई दिइएको छ ।

यसैगरी, एनआरएनए यूकेले आगामी जुन ४ मा अल्डर्शटमा हुने गोर्खा कपका दिन हेल्थ क्याम्प (स्वास्थ्य शिविर) को आयोजना गर्ने भएको छ । सोको संयोजन गर्ने जिम्मेवारी स्वास्थ्य विभाग संयोजक डा. विशाल गुरुङलाई दिइएको छ ।

एनआरएनए यूकेले नेपाल हाउस प्रोजेक्टको लागि रशमूर बरोका काउन्सिल लीडरहरुलाई कार्यालयमै निमन्त्रणा गरी एक अन्तरकृया तथा परामर्श कार्यक्रम आयोजना गर्ने भएको छ र त्यसको संयोजन अध्यक्ष प्रेम गाहा मगर गर्ने भएका छन् ।

साथै अगस्ट ६ मा वार्षिक साधारण सभा (काउन्सिल बैठक) को अवसर पारेर एनआरएनए भ्वाइसको नयाँ अंक प्रकाशन गर्ने निर्णय गरेको छ । सोको संयोजनको जिम्मेवारी उपाध्यक्ष रामचन्द्र पोखरेल र सम्पादनको जिम्मेवारी महासचिव खुशी लिम्बू र प्रवक्ता भरतमणी चोङबाङलाई दिइएको छ ।

एनआरएनए यूकेको बैंक वेलफेयर अकाउण्ट वन्द भएको भएको र सो खातामा रहेको करिब २६ हजार पाउण्ड खोजी गर्न उपाध्यक्ष नारायण कँडेल र कोषाध्यक्ष विष्णु खरेललाई जिम्मा  दिइएको छ ।

नेपालमा हुने नवौं राष्ट्रिय खेलकुद प्रतियोगितामा बेलायतबाट सहभागी हुन इच्छुक खेलाडीहरुलाई यात्रा खर्च एनआरएनए यूकेले उपलब्ध गराउने निर्णय गरेको छ भने एनआरएनए युकेको कार्यालयमा राजदूतावासको घुम्ती सेवा उपलब्ध गराइदिन नेपाली राजदूतावासलाई पुनः अनुरोध गर्ने निर्णय गरेको छ ।

गत २४ अप्रिल २०२२ को दिन कोभेण्ट्रीमा निधन भएका रामप्रसाद सुवेदीको आर्थिक अवस्था निकै कमजोर भएको भनी एनआरएनए यूकेमा निवेदन परेकोमा मृतकको परिवारलाई ५०० पाउण्ड प्रदान गर्ने निर्णय गरिएको छ ।

एनआरएनए यूकेको निर्वाचनमा राज्य समन्वय परिषदका उम्मेदवारहरुबाट लिइएको उम्मेदवारी शुल्क पूर्व निर्णयअनुसार ५० प्रतिशत केन्द्रमा राखी बाँकी ५० प्रतिशत सम्बन्धित राज्य समितिलाई फिर्ता गर्ने निर्णय गरिएको छ । यस्तै राज्यपरिषदहरुलाई प्रत्येक काउण्टी काउन्सिल गठन गरेबापत ३०० पाउण्ड प्रदान गर्ने निर्णय गरिएको छ ।

यस्तै मिडल्याण्डमा आयोजना हुने गोल्डेन एभरेस्ट क्रिकेट प्रतियोगितालाई एनआरएनए यूकेले आयोजना गर्ने र यसको नाम एनआरएनए क्रिकेट टुर्नामेण्ट राख्ने निर्णय गरिएको छ ।