मारिउपोल, यूक्रेन । पूर्वी यूक्रेनका रूस समर्थक समूहका एक नेताले यूक्रेनी सेनालाई सहयोग गरेको आरोपमा पक्राउ परेका दुई बेलायतीमाथिको मृत्युदण्डको सजायमा कुनै फेरबदल नहुने बताएका छन् ।
“तिनीहरू पैसाको लागि सर्वसाधारणलाई मार्न यूक्रेन आए । त्यसैले उनीहरुमाथि तोकिएको सजायमा कुनै कमी वा परिमार्जनको म कुनै सम्भावना देख्दिनँ,” उनीहरूलाई मुद्दा लगाउने पृथकतावादी डोनेट्स्क क्षेत्रका नेता डेनिस पुशिलिनले आइतबार सञ्चारकर्मीसँग बताएका छन् ।
पुशिलिनले भने, “अदालतले तीन जना लडाकूलाई ‘पूर्ण न्यायोचित सजायँ’ को घोषणा गरेको छ ।”
बेलायती प्रधानमन्त्री बोरिस जोनसनलाई उनीहरूको भाग्यलाई बेवास्ता गरेको र पृथकतावादी अधिकारीहरुसँग सम्पर्क गर्न नसकेको आरोप पनि उहाँले लगाउनुभयो ।
दुई बेलायती र एक मोरक्कोका नागरिकलाई रुस समर्थक समूहले पक्राउ गरी मृत्युदण्डको सजायँ सुनाएको छ ।
बेलायती प्रधानमन्त्री बोरिस जोन्सनका प्रवक्ताले बेलायती नागरिकहरू एडेन अस्लिन र शाउन पिनर र मोरोक्को ब्राहिम साडुनलाई सुनाइएको मृत्युदण्डको फैसलाले आफूलाई ‘आश्चर्य’ मा पारेको बताउनुभएको थियो ।
प्रवक्ताले भन्नुभयो, “यो कुरा स्पष्ट छ कि तिनीहरू यूक्रेनी सशस्त्र फौजका सदस्यहरू थिए र त्यसकारण तिनीहरू युद्धबन्दी हुन् । डोनेट्स्कका पृथकवादी अधिकारीहरूले उनीहरूलाई आरोप लगाए झैँ उनीहरू पैसाका लागि लड्न त्यहाँ गएका होइनन् ।”
अस्लिन र पिनरका परिवारका अनुसार यी दुई पुरुष सन् २०१८ देखि यस यूक्रेनमा बसोबास गर्दै आएका हुन् ।
शुक्रबार संयुक्त राष्ट्रसंघले रूस समर्थक युक्रेनी विद्रोहीहरूले कैदीहरूविरुद्ध मृत्युदण्ड सुनाएकोमा चिन्ता व्यक्त गरेको थियो ।
