लण्डन । बेलायतले तेस्रो महिला प्रधानमन्त्री पाएको छ ।
सत्तासीन कंजरभेटिभ पार्टीको नयाँ नेताका लागि भएको मतदानको सोमबार घोषित परिणामअनुसार लिज ट्रसले प्रतिस्पर्धी पूर्व अर्थमन्त्री ऋषि सुनकलाई पराजित गरेकी छिन् ।
उनले ८१ हजार ३२६ मत पाइन् भने सुनकले ६०३९९ मत पाए । पार्टीका कुल मतदाता १ लाख ७२ हजार ४३७ रहेका थिए ।
ट्रस अब बाँकी कार्यकालका लागि प्रधानमन्त्री रहनेछिन् ।
बेलायतले यसअघि मार्गरेट थ्याचर र थेरेसा मेलाई प्रधानमन्त्री पाइसकेको छ ।
लिज ट्रसको जन्म सन् १९७५ मा अक्सफोर्डमा भएको हो । उनका पिता गणितका प्राध्यापक थिए भने आमा नर्स थिइन् ।
उनको पूरा नाम मेरी एलिजावेथ ट्रस हो ।
उनको राजनीति लिबरल डेमोक्रयाट पार्टीबाट शुरु भएको थियो । अक्सफोर्डमा अध्ययन गर्दा उनी कन्जरभेटिभ पार्टीमा प्रवेश गरेकी थिइन् ।
उनी सन् २०१० मा पहिलोपटक सांसदमा निर्वाचित भएकी थिइन् । उनी साउथ वेष्ट नरफोक निर्वाचन क्षेत्रबाट सांसद निर्वाचित भएकी थिइन् । उनी सोही क्षेत्रलाई प्रतिनिधित्व गर्दै आएकी छिन् । त्यसअघि सन् २००१ र २००५ को आमचुनावमा उनले पराजय व्यहोर्नु परेको थियो । उनी सन् २००६ मा ग्रीनीच काउन्सिल लण्डनमा काउन्सिलर पदमा निर्वाचित पनि भएकी थिइन् ।
उनले सन् २०१२ देखि सरकारी जिम्मेवारी वहन गर्दै आएकी छिन् । शुरुमा उनी शिक्षा तथा शिशु स्याहार मन्त्रालयमा उपमन्त्री, त्यसपछि वातावरण, खाद्य र ग्रामीण मामिला राज्यमन्त्री, लर्ड चान्सलर, कोष मन्त्री बनिसकेकी छिन् ।
उनले सन् २०१९ मा महिला र समानता मन्त्रीको कार्यभार सम्हालेकी थिइन् भने त्यसपछि अन्तर्राष्ट्रिय व्यापार मन्त्री र सन् २०२१ देखि विदेश मन्त्रीको कार्यभार सम्हाल्दै आएकी छिन् ।
अक्सफोर्ड विश्वविद्यालयबाट राजनीति, अर्थशास्त्र र दर्शनशास्त्रको अध्ययन उनले पूरा गरेकी छिन् ।
राजनीतिमा आउनुअघि उनी उर्जा तथा दुरसन्चार क्षेत्रमा व्यापार प्रबन्धक, आर्थिक निर्देशक र लेखापालका रुपमा एक दशकभन्दा लामो समय काम गरेकी छिन् ।
उनका श्रीमान र दुई छोरी छन् ।
उनको सहलेखनमा पुस्तक समेत प्रकाशित छ ।
