लण्डन । बेलायतमा ब्याजदर करिब डेढ दशकयताकै उच्च दरमा पुगेको छ ।
बैँक अफ इङ्गल्याण्डले बिहीबार सातौँपटक ब्याजदर वृद्धि गर्दै आधारभूत दर २.२५ प्रतिशतमा पुर्याएको छ । यसअघि सो दर १.७५ प्रतिशत रहेको थियो ।
बेलायतका अधिकांश बैँक तथा वित्तीय संस्थाहरुले केन्द्रीय बैँकले तोकेको आधारभूत ब्याजदरभन्दा उच्च दरमा मात्र लगानी गरिरहेका छन् ।
सन् २००८ को विश्वव्यापी वित्तीय संकटका समयमा पनि ब्याजदर यो तहमा उक्लिएको थिएन ।
ब्याज दरको निर्णय लिन बिहीबार बसेको बैठकमा मौद्रिक नीति समितिका पाँच सदस्यमध्ये चार जनाले नयाँ ब्याजदरका पक्षमा मत जाहेर गरेका थिए ।
बैँक अफ इङ्गल्याण्डले बेलायत आर्थिक मन्दीमा गइसकेको आशंका गरेको छ । उसले जुलाईदेखि सेप्टेम्बरसम्ममा बेलायतको कुल ग्राहर्स्थ उत्पादन (जीडीपी) शुन्य दशमलव १ प्रतिशतले खुम्चिएको आँकलन गरेको छ ।
बैँकले मुद्रास्फिति अक्टोबर महिनामा ११ प्रतिशतसम्म पुग्ने प्रक्षेपण गरेको छ । तर पूर्वानुमान गरिएजस्तो मुद्रास्फिति २० प्रतिशत भने नपुग्ने बताइएको छ । केही महिना १० प्रतिशतको हाराहारीमा रहेर मुद्रास्फिति ओरालो लाग्नेछ ।
