लण्डन । विगतमा डार्टफोर्ड निर्वाचन क्षेत्रबाट बेलायतको संसदीय चुनावमा उम्मेदवार रही हाल ललितपुरस्थित नेपाल क्यान्सर अस्पतालका प्रमुख कार्यकारी अधिकृत डा बच्चुकैलाश कैनीको एकैसाथ पाँच वटा कृति विमोचन हुँदैछ । यही कात्तिक ५ गते शनिबार नेपाल प्रज्ञा प्रतिष्ठानमा उनका अदृश्य मनका सादृश्यहरु (निबन्धसंग्रह), भिसागर्ल (कथासंग्रह), सीमाहीन सीमा (कवितासंग्रह), प्रतिबिम्ब (गजलसंग्रह) र रंगको पहिचान (कवितासंग्रह) विमोचन हुँदैछ। पेशाले अस्पताल ब्यवस्थापक डा कैनीका विमोचन हुन लागेका पाँच वटै पुस्तक भने साहित्यिक हुन् । दुई वटा कविता संग्रह छन् बाँकी निबन्ध, कथा र गजल संग्रह छन् । प्रस्तुत छ उहाँसित यही सन्दर्भमा गरिएको छोटो कुराकानी ।
पाँचवटा कृति एकैसाथ ल्याउँदै हुनुहुँदोरहेछ । यो आकस्मिक योजना हो कि पूर्व योजना नै हो ?
साहित्यका धेरैवटा विधामा पहिलेदेखि नै लेख्दै आएको थिएँ । कथा, कविता, निबन्ध, गजल, समसामयिक विषयका लेख, रचनाहरु प्रकाशन हुँदै पनि आएको थियो । अहिले सबैलाई संग्रह गरेर हेर्दा पाँच वटा कृतिका लागि पर्याप्त पनि भेटियो । पहिले यसरी एकमुष्ट हेरिएको थिएन । नेपाल बसाइको पछिल्लो एक वर्षमा सबै सृजनाहरु केलाउँदा किताब निकाल्दा निकाल्दा सबै एकै पटक किन ननिकाल्ने भन्ने सोच आएको हो ।
लेख्ने बानी पुरानै हो भन्नु भयो । कहिलेदेखि लेख्न थाल्नुभयो ?
विद्यालय जीवनमा पनि फाट्टफुट्ट त लेख्थेँ । खास लेखन चाहिँ स्कुल जीवनपछि शुरु भएको हो । मेरो पहिलो लघुकथा मधुपर्कमा २०४९ सालमा छापिएको थियो । त्यसयता निरन्तर लेखिरहेको छु । कहिले कथा, कहिले कविता, कहिले निबन्ध, कहिले गजल, कहिले राजनीतिक र समसामयिक लेखहरु पनि लेखिरहेको छु । लेखन मेरो सौख हो । फुर्सदको समय भयो कि लेखिहाल्ने मेरो बानी छ ।
लेख्नका लागि समयको ब्यवस्थापन कसरी गर्नुहुन्छ ?
समय भनेको व्यवस्थापन गर्ने कुरा हो । किनकि सबैको लागि दिन २४ घन्टाकै हुन्छ । अहिले पनि म अस्पतालमा प्रमुख कार्यकारी अधिकृतका रुपमा पूर्णरुपमा कार्यरत छु भने एउटा कलेज र युएसएडको एक परियोजनामा सल्लाहकारका रुपमा आंशिक रुपमा कार्यरत छु । मेरो नियमित जीवनशैली छ । प्राय समय मिलाएर सबेरै लेख्ने गर्छु । धेरैजसो बिहान ४/५ बजे र सप्ताहन्तमा लेख्ने गर्छु ।
तपाईले प्रवासको जीवन अनुभव पनि भोग्नुभयो । फर्केर स्वदेशको जीवन पनि अनुभव गर्दै हुनुहुन्छ । तपाईको पुस्तकमा प्रवासका बारेमा पनि केही लेख्नुभएको छ कि ?
खासगरी कथा र कवितामा प्रवासका विषयहरु, नेपाल फर्किँदा मनमा उब्जिएका कुराहरु, सन्ततिका बारेमा उत्पन्न हुने चिन्ता र चासो प्रशस्तै लेखेको छु । मैले विगतमा प्रवासका अरु विषयमा पनि धेरै लेखहरु लेखेको थिएँ । तिनीहरु चाहिँ अहिले प्रकाशन हुन लागेका पुस्तकमा छैनन् ।
अन्त्यमा केही भन्न चाहनुहुन्छ कि ?
नेपालमा साहित्यिक कृतिहरु एउटै लेखकले पाँच/पाँचवटा निकाल्नु सामान्य कुरा होइन । त्यसमाथि हामी जस्तो नयाँ लेखकले निकालेको कृति पाठकहरुले कति मन पराउनुहुन्छ भन्ने पनि परीक्षणकै कुरा छ । आशा छ, पाठकहरुले मेरा कृतिहरु मन पराइदिनुहुनेछ ।
