लण्डन । लण्डनमा सडक दुर्घटनामा परी एक नेपाली युवाको निधन भएको छ ।
कामबाट घर फर्कँदै गर्दा मोटरबाइकमा सवार ३१ वर्षीय महेश चन्दको पुलबाट खसेर विहीबार राति निधन भएको छ ।
प्रहरीका अनुसार सो घटनामा अरू संलग्न नभएको बताइएको छ । कामबाट थाकेर मोटरसाइक चलाएका कारण सन्तुलन ब्रिग्रिँदा सो दुर्घटना भएको हुनसक्ने प्रहरीको प्रारम्भिक अनुमान रहेको छ ।
नेपालको डडेलधुरा पुर्ख्यौली घर भई हाल महेन्द्रनगरमा बसोबास रहेका चन्द करिब ६/७ वर्षदेखि लण्डनको पूर्वी उत्तर क्षेत्रमा परिवारका साथ बस्दै आएका थिए । चन्दको दुई नाबालक सन्तान (छ वर्ष र डेढ वर्षको) रहेको बुझिएको छ ।
चन्दको परिवारले उनको शव नेपाल लैजान चाहेको छ । त्यसका लागि आर्थिक अभाव भएपछि उनीहरुले सहयोगका लागि गैरआवासीय नेपाली संघ युकेमा निवेदन दिएका छन् । एनआरएनए युकेले चन्द परिवारका लागि आर्थिक सहयोग संकलन अभियान शुरु गरेको अध्यक्ष सुनिलबाबु खड्काले जानकारी दिनुभयो । संघले उपाध्यक्ष दीपक श्रेष्ठको संयोजकत्वमा अभियान शुरु गरेको छ ।
सहयोग गर्न इच्छुकदाताहरुले गैरआवासीय नेपाली संघ युकेको बैँक खाता Non-Resident Nepalese Association UK Account No ५१७०७००० Sort Code 40-46-22 मा सहयोग गर्न सकिने बताइएको छ ।
