लण्डन । नेपाल भ्रमणमा रहेका बेलायतका भेट्रान मन्त्री आन्ड्रयू मरिसनलाई गोरखाहरुले वार्ताबाट माग पूरा नभए फेरि आमरण अनसन बस्ने चेतावनी दिएका छन् ।
आज काठमाडौँमा मन्त्री मरिसनले आयोजित एक कार्यक्रममा पूर्व गोरखा सैनिकहरुसित छलफल गरेका थिए । सो अवसरमा बोल्दै पूर्व गोरखा सैनिक डा रामनारायण कन्दङवाले बेलायतसित एक हजार वर्षभन्दा लामो प्रजातन्त्रको इतिहास रहेको र प्रजातन्त्रको सौन्दर्य र मूल्य मान्यताहरु समानता, न्याय र स्वाभिमान भए पनि गोरखाहरुले त्यस्तो महसुस गर्न नपाएको बताए ।
गोरखाहरुको मुख्य माग समान पेन्सन रहेको स्मरण गराउँदै उनले नेपाल र बेलायत सरकारबीच चालू वार्ता प्राविधिक टोलीले तय गरेको १३ बुँदामा वार्ता हुनुपर्नेमा जोड दिए । गोरखाहरुको माग बेलायतले पूरा नगरेमा मे १ तारिखबाट आमरण अनसन बस्ने निस्कर्षमा आफूहरु पुगेको पनि उनले जानकारी दिए । आमरण अनसन बस्नु गोरखाहरुको रहर नभई बाध्यता भएको उनी उनले प्रष्टीकरण दिए । माग पूरा गर्नका लागि दबाब दिन अन्य वैकल्पिक उपायहरु अपनाउँदा बेलायतले वेवास्ता गरेकाले आमरण अनसन बस्नु बाध्यता भएको उनको जिकिर थियो ।
सन् १९४७ को त्रिपक्षीय सन्धिका आधारमा बेलायतले अहिले पनि नेपालबाट गोरखा भर्ती गरिरहेको सन्दर्भ उठाउँदै कन्दङवाले बेलायतमा महिलालाई मतदानको अधिकार समेत नभएको र नेपालमा दासताको अवशेष कायम रहेको समयमा गरिएको सो सन्धिले आजको समयको प्रतिनिधित्व गर्न नसक्ने बताए ।
जवाफमा मन्त्री मरिसनले गोरखाहरुको मागको सन्दर्भमा आफूहरु सकारात्मक रहेको तर आफ्नो मात्र प्रतिवद्धताले गोरखाहरुको माग पूरा गर्ने ग्यारेन्टी गर्न नसक्ने बताए । गोरखाहरुको माग बेलायतको अर्थ मन्त्रालयसित पनि जोडिएको हुनाले आफ्नो मन्त्रालयले मात्र पूरा गर्न नसक्ने उनको भनाइ थियो । गोरखाहरुको वेलफेयरका बारेमा भने धेरै गर्न सकिने उनले आश्वासन दिए । सो अवसरमा बेलायती सेनाका उच्चपदस्थ अधिकृतहरुको पनि उपस्थिति रहेको थियो ।
