एनआरएनए यूकेद्वारा सदस्यता लिन आग्रह

लन्डन । गैरआवासीय नेपाली संघ बेलायत (एनआरएनए यूके)ले सदस्यता लिनको लागि बेलायतबासी सम्पूर्ण नेपालीहरुलाई आग्रह गरेको छ ।
संघको आगामी निर्वाचनको लागि उम्मेदवार बन्नलाई समेत सदस्यता बन्न र बनाउन आग्रह गरेको छ ।
यसअघि नै एनआरएनए यूकेको राष्ट्रिय समन्वय परिषदको बैठकले सर्वसम्मतले निर्वाचन समिति गठन गरेको थियो ।
आगामि २०२३–२५ कार्यकालको लागि जुलाई २२ मा हुने निर्वाचनको लागी निर्वाचन समितिको संयोजकमा संघका संस्थापक सचिव चिरन्जीवी ढकाललाई नियुक्त गरिएको छ । समितिका अन्य सदस्यहरुमा तमुधि युकेका अध्यक्ष हरि गुरुङ र एनआरएनए युकेका संस्थापक सदस्य एवम पत्रकार बिपिन निरौला रहेका छन । सात सदस्यीय निर्वाचन समितिमा बाँकी चार सदस्यहरु अध्यक्ष सुनिल बाबु खडकासंग सरसल्लाह गरी थप्ने अधिकार निर्वाचन समिति संयोजकलाई दिइएको छ ।
गैरआवासीय नेपाली संघ बेलायतका प्रवक्ता शशांक शर्माका अनुसार बैठकले संघको २०२३–२५ कार्यकालको लागी सदस्यता परिचालन समितिका संयोजक उपाध्यक्ष रामचन्द्र पोखरेलको नेतृत्वमा छिट्टै नै बेलायतका गैरआवासीय नेपाली संघलाई माया गर्ने सामाजिक अभियन्ताहरुलाई राखी सदस्यता परिचालन समितिलाई पूर्णता दिइनेछ ।
संघका अध्यक्ष सुनिलबाबु खडकाको अध्यक्षतामा जुममा बसेको बैठकले सदस्यता आवेदनको अन्तिम मिति जुन २३ तोकेको छ भने संघको ११औँ अधिवेशन जुलाई १६ र संघको २०२३–२५ को कार्यसमितिको निर्वाचन २२ जुलाईमा गर्ने निर्णय गरेको छ ।