लण्डन । बेलायतको केन्द्रीय बैँक बैँक अफ इङ्ग्ल्याण्डले आधारभूत ब्याजदर फेरि बढाएको छ ।
विहीबार बसेको बैङ्कको मौद्रिक समितिको बैठकले ०.२५ प्रतिशतले ब्याजदर बढाउने निर्णय गरेको हो । यसअघि आधारभूत ब्याजदर ५ प्रतिशत रहेको थियो ।
९ सदस्सीय समितिमा ६ सदस्यले ०.२५ प्रतिशत बढाउने पक्षमा, दुई सदस्यले ०.५ प्रतिशत बढाउनुपर्ने र एक सदस्यले ५ प्रतिशतमै यथावत राख्नुपर्ने मत राखेका थिए ।
यो बैँक अफ इङ्ग्ल्याण्डले ब्याजदर बढाएको लगातार १५ औँ पटक हो । तथापि जुन महिनामा मुद्रास्फिति अपेक्षित दरमा कमी आएकाले बैँकले कम मात्र वृद्धि गरेको हो।
यो १५ वर्ष यताकै सर्वाधिक ब्याज दर हो । यसअघि २००८ को अप्रिलमा यति ब्याजदर थियो ।
बैँकले आजै प्रकाशित गरेको मौद्रिक नीतिमा यो वर्षको अन्तिम चौमासिक सम्ममा बेलायतमा मुद्रास्फिति ५ प्रतिशतभन्दा कम्ती हुने पूर्वानुमान गरिएको छ ।
उता बेलायतका अर्थ मन्त्री जेरेमी हन्टले भने एक वर्षभित्रमा मुद्रास्फिति ३ प्रतिशत वरिपरि आउने बताएका छन् ।
खाद्यवस्तुमा रहेको चर्को स्फिति भने यस वर्षको अन्त्यसम्ममा पनि उच्च नै रहने बैङ्कले अनुमान गरेको छ । सो दर अहिले १७ प्रतिशत रहेकोमा वर्षको अन्त्यमा १० प्रतिशतमा झर्ने अपेक्षा गरिएको छ ।
ब्याजदर वृद्धिले वचतकर्तालाई फाइदा पुगेको छ भने कर्जा लिनेहरूलाई भने निक्कै असर पुगेको छ ।
कहिले कति बढ्यो ?
| Date Changed | Rate |
| 03 Aug 23 | 5.25 |
| 22 Jun 23 | 5.00 |
| 11 May 23 | 4.50 |
| 02 Feb 23 | 4.00 |
| 15 Dec 22 | 3.50 |
| 03 Nov 22 | 3.00 |
| 22 Sep 22 | 2.25 |
| 04 Aug 22 | 1.75 |
| 16 Jun 22 | 1.25 |
| 05 May 22 | 1.00 |
| 17 Mar 22 | 0.75 |
| 03 Feb 22 | 0.50 |
| 16 Dec 21 | 0.25 |
| 19 Mar 20 | 0.10 |
