संघीयता र संविधान खतरामा : यादव

न्यूयोर्क । नेपालमा अहिले ठूला राजनीतिक दल र यो व्यवस्थालाई नस्विकार्ने तत्वहरूको सक्रियताले संघीय लोकतान्त्रिक गणतन्त्र र संविधानमाथि नै खतरा उत्पन्न रहेको जनता समाजवादी पार्टीका अध्यक्ष उपेन्द्र यादवले बताउनुभएको छ ।

न्यूयोर्कमा नेपाली समाज अमेरिकाले आयोजना गरेको कार्यक्रममा उहाँले अहिले देशमा देशी विदेशी तत्वहरू र संघीयता, समानुपातिक प्रणाली, समावेशीकरण, धर्मनिरपेक्षता र गणतन्त्र नचाहने शक्तिहरू सल्बलाएको उहाँले बताउनुभयो ।

नेपाल बहुभाषिक, बहुधार्मिक, बहुजातिय, बहुसाँस्कृतिक विविधतायुक्त समाज रहेकोले यहाँ कसैले कसैलाई पनि विभेद गर्न नहुने र समाजमा एकता, सद्भाव र एक अर्काको पहिचान स्वीकारेर मात्र देश विकास गर्न सकिने उहाँको विचार थियो । जनयुद्ध, जनान्दोलन, मधेश विद्रोह, आदिवासी जनजाति आन्दोलन र दलित, मुस्लिम, थारू साथै महिलाहरूको बलिदानीपूर्ण संघर्ष र त्यागबाट अहिलेको व्यवस्था आएको हुनाले यसको रक्षा गर्दै समाजवाद उन्मुख विकासका योजनाहरू अगाडि बढाउनु सबैको जिम्मेवारी रहेको उहाँ बताउनु भयो ।

अर्को फरक प्रशंगमा प्रवासमा रहेका नेपाली नागरिकहरूले आगामी निर्वाचनदेखि मतदान गर्न पाउने व्यवस्था मिलाउन अहिलेको सरकारले कार्य गरिरहेको उहाँले बताउनुभयो । यसमा प्राविधिक रूपमा प्रत्यक्ष उम्मेद्वारलाई मत दिने व्यवस्था मिलाउन नसकिए पनि समानुपातिक प्रणालीमा मतदान गर्न सकिनेमा उहाँले विश्वास दिलाउनु भयो ।

छोटो समयका लागी अमेरिका भ्रमणमा आएका यादवलाई न्यूयोर्कमा नेपाली समुदायको तर्फबाट स्वागत र सम्मान गरिएको थियो ।

त्यसक्रमा नेपाली समुदायका अगुवा बुद्विजीवी, समाजसेवी, पत्रकार, विभिन्न संघ संस्थाका प्रतिनिधिहरूले नेपालमा संघीयता, पहिचान, समावेसी समानुपातिक प्रणाली, गणतन्त्र र धर्मनिरपेक्ष जस्ता जनताको पक्षमा उभिने र रक्षाको लागी पनि जसपामा नै आशा विश्वास र भरोसा रहेको बताए ।

नेपाली समाज अमेरिकाका अध्यक्ष समिर महर्जनको अध्यक्षतामा सम्पन्न कार्यक्रमको सन्चालन पूर्व महासचिव लोक चेम्जोङले गरेका थिए ।