कोशी प्रदेशको मुख्यमन्त्रीमा काँग्रेसका कार्की नियुक्त

कोशी प्रदेशका प्रदेश प्रमुख परशुराम खापुङ शनिबार प्रदेश प्रमुखको कार्यालय विराटनगरमा नवनियुक्त मुख्यमन्त्री केदार कार्कीलाई नियुक्ति पत्र हस्तान्तरण गर्दै ।

विराटनगर । कोशी प्रदेशको मुख्यमन्त्रीमा नेपाली कांग्रेसका केदार कार्की नियुक्त हुनुभएको छ । आज ४७ प्रदेशसभा सदस्यको हस्ताक्षर सनाखत गरिएपछि उहाँ मुख्यमन्त्रीमा नियुक्त हुनुभएको हो ।
कार्कीलाई मुख्यमन्त्री पदमा नयुक्त गर्नुअघि नेकपा (एमाले) का ३९ तथा कांग्रेसका आठ प्रदेशसभा सदस्यको हस्ताक्षर सनाखत गरिएको थियो । लगत्तै प्रदेश प्रमुख परशुराम खापुङ्गले कार्कीलाई कोशी प्रदेशको मुख्यमन्त्रीमा नियुक्त गर्नुभएको हो । कार्कीलाई नेपालको संविधानको धारा १६८ को उपधारा (५) बमोजिम मुख्यमन्त्री पदमा नियुक्त गरिएको हो । मुख्यमन्त्री पदको शपथ भने आइतबार हुने प्रदेश प्रमुखको सचिवालयले जनाएको छ ।
यसअघि नेकपा (एमाले) का ३९ तथा कांग्रेसका आठ (मुख्यमन्त्रीमा नियुक्त कार्कीसहित इन्दिरा थापा, शम्शेर राई, लीलाकुमारी राई, गोविन्द गिरी, सुनिताकुमारी गुरुङ, रामकुमार खत्री र मानबहादुर लिम्बू) को प्रदेश प्रमुखको कार्यालयमा सनाखत गरिएको थियो ।
कोशी प्रदेशमा पछिल्लो निर्वाचनयता दुई मुख्यमन्त्री चारपटक नियुक्त भइसकेका छन् । कार्की पाँचौँ मुख्यमन्त्री हुन् ।

प्रतिक्रिया

सम्बन्धित सामाग्री