लन्डन । ३३औं समर ओलम्पिक (पेरिस ओलम्पिक २०२४) को उद्घाटन गरिएको छ ।
शुक्रबार पहिलो पटक स्टेडियम बाहिर उद्घाटन समारोह आयोजना गरी फरक शैलीमा उद्घाटन गरिएको हो ।
समारोह पेरिस छेउको सेन नदीमा भएको थियो । जहाँ विश्वका २०६ राष्ट्रका खेलाडीहरु विभिन्न शैलीका डुङ्गाहरु चढेर मार्सपासमा सहभागी भएका थिए ।
अन्तर्राष्ट्रिय सञ्चार माध्यमले जनाए अनुसार उनीहरु ८५ वटा बोटमा चढेर करिब ६ किलोमिटर लामो परेडमा सहभागी भएका थिए ।
फ्रान्सेली राष्ट्रपति माक्रोनले ३३औं समर ओलम्पिकको उद्घाटन भएको घोषणा गर्नुभएको थियो । उद्घाटन समारोहमा चर्चित गायिक लेडी गागा, सेलियन डियोन लगायतले प्रस्तुति दिनुभएको थियो ।
यस्तै फ्रेन्च फुटबल लेजेण्ड जिनेदिन जिदान, टेनिस स्टार राफायल नाडाल लगायत सहभागी हुनुभयो ।
पेरिस ओलम्पिकको उद्घाटन समारोहको मार्च पासमा नेपालको झन्डा टेबलटेनिसका श्यान्टु श्रेष्ठ र जुडोकी मनिता श्रेष्ठ प्रधानले बोक्नु भएको थियो ।
पेरिस ओलम्पिकमा नेपालीसहित विश्वका १० हजार ७१४ खेलाडीले ३२ खेलको ३२९ इभेन्टमा प्रतिस्पर्धा गर्नेछन् ।
