लन्डन । ग्रेटर रेडिङ नेप्लिज कम्युनिटी (जीआरएनसी) ले बर्सेनि गर्दै आएको रेडिङकपको १७ औं संस्करण यही अगस्ट ३१ तारिखमा हुने भएको छ ।
रेडिङको पाल्मर पार्कमा प्रतियोगितामा तय गरिएको १७ औं रेडिङकप संयोजक तथा जीआरएनसीका सचिव डा भरत पौडेलले जानकारी दिनुभयो । उहाँका अनुसार प्रतियोगतामा युवा, भेट्रान र सुपर भेट्रान गरी तीन छुट्टाछुट्टै समूहमा प्रतिस्पर्धा हुनेछ । युवामा १६, भेट्रानमा १२ र सुपर भेट्रानमा ८ टीमले भाग लिँदैछन् ।
रेडिङकपको मुख्य एवम् युवा विधामा विजेतालाई २ हजार २४ पाउण्ड नगदसहितको पुरस्कार छ भने उपविजेता टिमले नगद १ हजार २४ प्राप्त गर्नेछन् । भेट्रान र सुपर भेट्रानमा विजेतालाई क्रमशः १ हजार २४ र ५ सय २४ तथा उविजेतालाई क्रमशः ५ सय २४ र ३ सय २४ पाउण्ड नगद पुरस्कार दिइनेछ ।
प्रतियोगितामा प्रवेश शुल्कस्वरुप हरेक टीमलाई युवा र भेट्रान विधामा २ सय ५० पाउण्ड तथा सुपर भेट्रान विधामा १ सय ५० पाउन्ड लाग्नेछ ।
रेडिङकपमा फुटबलका साथै विविध मनोरञ्जनात्मक प्रस्तुतिहरुको पनि आकर्षण रहने आयोजकले जनाएको छ । प्रतियोगितास्थलमा नेपाली खाना तथा विभिन्न व्यापारिक स्टलहरुका साथै मौलिक नेपाली पञ्चेबाजासहितका विविध सांस्कृतिक कार्यक्रम पनि प्रस्तुत गर्ने तयारी रहेको जीआरएनसी अध्यक्ष भिमसेन खड्काले बताउनुभएको छ । उहाँले जिम्मेवारी बाँडफाँड गरेर तयारी भइरहेको समेत जानकारी गराउनुभयो ।
