काठमाडौँ । सहकारीको रकम ठगी आरोपमा राष्ट्रिय स्वतन्त्र पार्टी (रास्वपा) सभापति रवि लामिछाने पक्राउ परेका छन् ।
जिल्ला अदालत कास्कीको अनुमतिपछि शुक्रबार पार्टी केन्द्रीय कार्यालय पुगेको प्रहरी टोलीले साँझ पक्राउ गरेको हो । सभापति लामिछानेले पक्राउ पर्नुअघि केहीबेर पार्टी सदस्य र सञ्चारकर्मीलाई आफ्ना कुरा राखेका थिए ।
उनलाई पोखरा लगिँदै छ । सूर्यदर्शन सहकारीको रकम अपचलनमा संलग्न भएको आरोपमा उनीविरुद्ध अनुसन्धान गर्न कास्की जिल्ला अदालतले नेपाल प्रहरीलाई अनुमति दिएको थियो । लामिछानेसहित १४ जनाविरूध्द पक्राउ पुर्जी जारी गरिएको छ।
सूर्यदर्शन सहकारीको संस्थापक अध्यक्ष गीतेन्द्रबावु (जीबी) राईसँग मिलेर लामिछानेले गोर्खा मिडिया नेटवर्कमा रकम ल्याएर अपचलन गरेको मुद्दा जिल्ला प्रहरी कार्यालय कास्कीले अनुसन्धान गरिरहेको छ ।
