लन्डन । सुनसरीको धरान उपमहानगरपालिकाका मेयर हर्क साम्पाङ (हर्कराज राई) दुई साताभन्दा बढी बेलायत भ्रमण सकाएर नेपाल फिर्ता हुनुभएको छ ।
परिवारसहित बेलायत आउनुभएका राई शनिबार २ नोभेम्बर २०२४ लन्डनस्थित हिथ्रो विमानस्थलबाट स्वदेश फर्कनु भएको हो । उहाँको बिदाईमा बेलायतका विभिन्न संघ संस्थाका अध्यक्ष, प्रतिनिधि, आफन्त, शुभचिन्तकहरु हिथ्रो विमानस्थल पुगेका थिए ।
नेपाल प्रस्थान गर्नुअघि मेयर साम्पाङले बेलायत भ्रमण अविष्मरणीय र सफल भएको प्रतिक्रिया जनाउनुभएको छ । उहाँले बेलायतमा साथ सहयोग गर्ने सबैलाई धन्यवाद दिनुभयो । धरानको चिन्डेडाँडामा निर्माण गर्न लागिएको सुम्निमा पारुहाङको प्रतिमाका लागि सहयोग संकलनका लागि आउनुभएका साम्पाङले ५ करोड २८ लाख ३८ हजार ७७४ रुपैयाँ सहयोग प्रतिबद्धता आएको जनाकारी गराउनुभएको छ ।
भ्रमणका क्रममा मेयर साम्पाङले ऐतिहासिक चाथाम डकयार्ड र लन्डनको संसद् भवनको भ्रमण गर्नुभयो । चाथाम र आयल्सफोर्डका सांसद ट्रिस्टान ओस्बोर्न, जीलिङ्घाम र रेनहामका सांसद नौसभा खान र स्वकीय सचिवले संसद् भवनको विशेष अवलोकन गराउनुभयो । यस अवसरमा भूतपूर्व गोर्खा सैनिकहरू भबिन राई, ताईकाजी गुरुङ र भूमिराज राईसहित, मेयर साम्पाङ र सांसद ट्रिस्टान ओस्बोर्नले संसद् परिसरमा रहेको मेमोरियल गार्डेनमा अमर सहिदहरुको सम्मानमा क्रस गाडेर पप्पीफूल अर्पण गर्नुभयो ।
चाथाम डकयार्ड र संसद् भवनको भ्रमणको व्यवस्थापन नेपाली मूलकी पहिलो महिला मेयर काउन्सिलर निना गुरुङले गर्नुभएको थियो । केन्ट काउन्सिल, फोल्कस्टोन र हाइथका मेयरहरूसँग भेटघाट गर्नुका साथै केन्ट काउन्टी काउन्सिलका प्रेसिडेन्टसँग छलफल गर्नुभयो । उहाँले प्राइमरी स्कूलको भ्रमण गर्दै त्यहाँको शिक्षा प्रणालीबारे जानकारी लिनुभयो । पारिवारिक समयका क्रममा विन्ड्सर क्यासल र लन्डन घुम्नुभएको थियो ।
नेपाल रनको १० के रनमा प्रमुख अतिथि बन्नुका साथै उहाँले विभिन्न गोर्खाली पल्टनहरू, ऐतिहासिक चाथाम डकयार्ड, संसद् भवन, स्टोनहेन्ज र गोर्खा वेलफेयर ट्रस्टको पनि अवलोकन भ्रमण गर्नुभयो । उहाँको भ्रमणको व्यवस्थापन धरान समाज यूकेले गरेको हो।
