तमुधीं यूके आमा समूहको सहयोगमा विद्यार्थीलाई न्यानो लुगा वितरण

लन्डन । तमुधीं यूके आमा समूहको सहयोगमा कास्कीका दुई विद्यालयका विद्यार्थीलाई न्यानो लुगा वितरण गरिएको छ ।

कास्कीको माछापुच्छ्रे गाउँपालिका – १, खारपानी मिर्सास्थित अन्नपूर्ण आधरभूत विद्यालय प्राङ्गणमा भुम्दिकोट समाज आमा समूह अध्यक्ष झुमा गुरुङको अध्यक्षता र वडाअध्यक्ष इन्द्रबहादुर गुरुङको प्रमुख आतिथ्यतामा सम्पन्न कार्यक्रममा ७७ विद्यार्थीलाई ट्रायकसुट, १७ अपाङ्ग, वृद्ध, सुस्त मनस्थितिलाई न्यानो लुगा वितरण गरिएको हो ।

यस्तै हिमाली डाँफे आधरभूत विद्यालयलाई स्टेसनरी सामग्री, खेलकुद सामग्री, न्यानो म्याट, वाटर डिस्पेन्सर, ग्यास चुल्हो, स्लाइडर (चिप्लेटी) भुम्दिकोट समाज आमा समूह र तमुधीं यूके आमा समूहको ‘न्यानो ल्होछार ०८१’ अन्तर्गत शनिबार वितरण गरिएको सञ्चारकर्मी एवं अभियन्ता युग गुरुङले जानकारी गराउनुभयो । उहाँका अनुसार तमुधीं यूके आमा समूहले यस वर्ष ६० हजार सहयोग गरेको हो । तमुधीं यूकेको हालै नयाँ अध्यक्षमा कमलादेवी गुरुङ निर्वाचित हुनु भएको छ । यसअघि सन्ध्या गुरुङ नेतृत्वमा हुनुहुन्थ्यो ।

कार्यक्रममा प्रमुख अतिथि लगायत सम्पूर्ण शिक्षक/शिक्षिकालाई मायाको चिनोस्वरुप थर्मस दिइएको थियो । ‘न्यानो ल्होछार ०८१’ का संयोजक भुम्दिकोट समाजका सचिव राजु गुरुङ हुनुहुन्थ्यो भने आमा समूह सचिव देउता गुरुङले कार्यक्रम सञ्चालन गर्नुभयो ।

कार्यक्रको अन्तमा अतिथि, विद्यार्थी, अभिभावक, शिक्षक सबै सँगै ल्होछार स्यो कै (वनभोज) मा रमाएका थिए ।