नेपाली कांग्रेसका नेता डा कोइराला बेलायतमा

लन्डन । बेलायतको संसद्‌ भवन परिसर र अन्य ठाउँमा हुने कार्यक्रमका लागि नेपाली कांग्रेसका नेता डा शेखर कोइराला लन्डन आइपुग्नुभएको छ ।

नेता कोइराला बिहीबार राति १०:३० बजे लन्डन हिथ्रो विमानस्थल टर्मिनल फोर उत्रिनु भएको हो । उहाँलाई बेलायतस्थित नेपाली कांग्रेसका कार्यकर्ता तथा शुभेच्छुकहरुको जम्बो टोलीले स्वागत गरेको थियो ।

उहाँ बेलायतको एसिया मामला हेर्ने विदेश राज्यमन्त्री क्याथराइन वेष्ट र उद्योग व्यापार वाणिज्यमन्त्री ग्यारेथ थोमसको निमन्त्रणामा बेलायत आउनुभएको हो ।

कोइरालाले आउँदो १३ जनवरी साँझ बेलायती संसद् भवनको एक कक्षमा गर्न लागिएको विशेष कार्यक्रममा सम्बोधन गर्ने कार्यक्रम छ । कार्यक्रममा बेलायतका एसिया मामिला हेर्ने विदेश राज्यमन्त्री, उद्योग, व्यापार तथा वाणिज्यमन्त्री, बेलायती सांसदहरू एवं नेपाली समुदायका प्रतिनिधिहरुको उपस्थिति रहने जनाइएको छ ।

नेता कोइरालाले एक साता बेलायतमा रहँदा बेलायती राजनीतिज्ञहरुसंग भेटघाट साथै विभिन्न शहरमा नेपाली समुदाय र कांग्रेस कार्यकर्तासँग पनि अन्तरक्रिया गर्नुहुनेछ ।

नेता कोइराला बेलायत भ्रमण पूरा गरी जनवरी १६ तारिख नेपाल फर्किने उहाँको सचिवालयले जनाएको छ ।