हेल्प नेपाल नेटवर्क यूकेले मनायो २५ औं वार्षिकोत्सव

लन्डन । हेल्प नेपाल नेटवर्क यूकेले २५ औं वार्षिकोत्सव मनाएको छ । हेल्प नेपालले आइतबार फार्नबरोस्थित गोर्खा प्यालेस रेष्टुरेन्टमा एक समारोहबीच वार्षिकोत्सव मनाएको हो ।

कार्यक्रमका प्रमुख अतिथि बेलायतका लागि नेपालका कार्यवाहक राजदूत विपिन दुवाडीले शुभकामना दिँदै हेल्प नेपालले नेपालका लागि गरेको योगदानको प्रशंसा गर्नुभयो । ‘देश दुख्दा विदेशमा झन् बढी दुख्छ, तपाईंहरुले नेपाल अप्ठेरोमा पर्दा सहयोग गरिरहनु भएको छ । यो प्रशंसनीय छ,’ उहाँले भन्नुभयो ।

अरुको अस्तित्व स्वीकार्न सक्नु नै मानवता भएको जनाउँदै उहाँले हेल्प नेपालले त्यो मानवता प्रदर्शन गरेको बताउनुभयो । प्रशासनिक खर्च नगरी चन्दा रकम सबै च्यारिटीमा लगाउनु निकै सरहानीय भएको उहाँले बताउनुभयो । प्रष्ट देखिने खालको नतिजा आउने गरी परियोजनाहरु संचालन गर्न पनि उहाँले सुझाव दिनुभयो ।

कार्यक्रममा स्वागत मन्तव्य दिँदै उपाध्यक्ष प्रसिद्ध प्रधानले परोपकारमार्फत नेपाली डायस्पोरालाई नेपालसँग जोड्ने उद्देश्यले स्थापित हेल्प नेपाल अहिले करिब एक दर्जन देशमा फैलिएको जनाउनुभयो ।

अध्यक्ष सचिन श्रेष्ठले हेल्प नेपाल नेटवर्कले विशेषगरी शिक्षा, स्वास्थ्य र प्राकृतिक विपत्तिमा सहयोग गरिरहेको बताउनुभयो । उहाँले हालसम्म संस्थाले १७ हेल्थ क्याम्पसहित २१ स्वास्थ्यसम्बन्धी प्रोजेक्ट गरेको, ४० लाइब्रेरी र ५० बढी इ-लाइब्रेरी स्थापना, गोर्खा, दोलखा र सिन्धुपाल्चोकमा भूकम्पबाट क्षतिग्रस्त विद्यालयहरुको पुनर्निर्माण, विभिन्न स्कूलहरुमा ६८ वटा कक्षा कोठा निर्माण साथै तीनवटा हेल्थ पोष्टको सञ्चालनमा सहयोग गरेको जनाउनुभयो ।

संस्थाले काभ्रेको धुलिखेलमा बालगृह र मुगुको मुर्मामा हेल्थ पोष्ट सञ्चालन गरिरहेको उहाँले जानकारी दिनुभयो ।

कार्यक्रममा शिव कल्चर मन्दिर अध्यक्ष विक्रम भट्टराई, पासा पुचः गुथि यूके अध्यक्ष सुशील प्रजापति, नेपाल पत्रकार महासंघ बेलायतका निवर्तमान अध्यक्ष ध्रुवराज अर्याल, समाजसेवी शिवजी श्रेष्ठ, बुद्ध फाउण्डेशन यूके अध्यक्ष दीपक श्रेष्ठ, सहारा यूके अध्यक्ष कृष्ण गुरुङ, आरजिएनएसका महासचिव ह्यारी गुरुङ, ब्रिटेन नेपाल चेम्बर अफ कमर्सका अध्यक्ष डा. कपिल रिजाल, अधिवक्ता सुरेन्द्र श्रेष्ठ, समाजसेवी एकेन्द्र गुरुङ, युवा उद्यमी किशोर सापकोटा, तमु धीं यूकेका संस्थापक अध्यक्ष मीनप्रसाद गुरुङले शुभकामना दिनुभएको थियो ।

त्यसैगरी एनआरएनए यूके अध्यक्ष हित काजी गुरुङ, एनआरएनए यूके आईसीसी सदस्य दिलरास गुरुङ र ले. रि. चन्द्र गुरुङ, एनआरएनए यूके पूर्वअध्यक्ष पुनम गुरुङ, तमु धीं यूके अध्यक्ष जुमकाजी गुरुङ र हेल्प नेपाल नेटवर्क यूकेका सल्लाहकार चिरञ्जीवी ढकालले पनि शुभकामना दिँदै संस्थाको परोपकारी कार्यले अझ तीव्रता पाओस् भन्ने कामना गर्नुभएको थियो ।

हेल्प नेपालको सहयोगार्थ ल्हासादेखि माउण्ट एभरेष्ट हुँदै काठमाडौं साइकल यात्रा गरेका दिनेश पाल तथा मुगुको हेल्थ पोस्टको भ्रमण गरेका चन्द्र देवकोटाले आफ्नो अनुभव सुनाउनुभएको थियो ।

संस्थाका कार्यसमिति सदस्य तथा ब्रिटिश आर्मीका मेजर डा. सुदर्शन गुरुङले ‘ब्लड फर नेपाल’ प्रोजेक्टअन्तर्गत आफूले नेपालका स्वास्थ्यकर्मीहरुलाई तालिम दिने बताउनुभयो । हेल्प नेपाल नेटवर्क यूकेका सल्लाहकार सूर्य गुरुङले धन्यवाद मन्तव्य दिँदै संस्थाले नेपालका दुर्गम क्षेत्रमा पनि सेवा पुर्‍याइरहेको जनाउनुभयो ।

‘यो संस्था अहिले एक पवित्र र साझा ग्लोवब संस्था बन्दै गएको छ । तपाईंहरुको साथले नै यो सम्भव भएको हो’, गुरुङले भन्नुभयो ।

सो अवसरमा हेल्प नेपाल नेटवर्कको २५ औं वार्षिकोत्सवको अवसरमा नेपाली साइकिलिङ क्लब यूके टीमले आगामी मे महिनामा पोर्चुगलदेखि स्पेनसम्मको च्यारिटी साइकल यात्रा गर्ने घोषणा गरियो । उक्त साइकलयात्राबाट संकलित कोष डा सुदर्शन गुरुङले मुगुमा सञ्चालन गर्ने हेल्थ प्रोजेक्टमा खर्च गरिनेछ ।

कार्यक्रममा नेटवर्कमार्फत आर्थिक तथा भौतिक सहयोग गर्ने सहयोगी एवं स्वयंसेवकहरुलाई कार्यवाहक राजदूत दुवाडीले प्रशंसापत्र प्रदान गर्नुभएको थियो ।

कार्यक्रममा चित्रकार गोविन्द शाह आजादले प्रायोजन गरेको चित्रकला (मण्डला) र सुशील प्रजापतिले प्रायोजन गरेको सारंगी ‘अक्शन’ गरिएको थियो ।

हेल्प नेपाल नेटवर्कका ग्लोबल कोअर्डीनेटर, डिला खरेल, हेल्प नेपाल नेटवर्क नेपाल अध्यक्ष अरुण सिंह बस्नेत लगायतले कार्यक्रमको सफलताको कामना गर्दै शुभकामना सन्देश पठाउनुभएको थियो । नेटवर्कका मिडिया संयोजक भगीरथ योगीले कार्यक्रम सञ्चालन गर्नुभएको थियो ।