आप्रवासीको डुङ्गा पल्टिदाँ कम्तीमा ४२ को मृत्यु

तस्विरः गेटी इमेज, एएफपी

कायरो, ५ असोज । इजिप्टको उत्तरी तटीय क्षेत्रमा आप्रवासी सवार रहेका एक डुङ्गा दुर्घटना हुँदा मृत्यु हुने व्यक्तिको सङ्ख्या कम्तीमा ४२ पुगेको छ ।

अझै पनि उद्धारको प्रयास जारी रहेको मेना समाचार समितिले बुधबार जानकारी दिएको छ ।

इजिप्टको उत्तरी प्रान्त बेहैरानजिकै तटीय क्षेत्रमा करिब ६ सय व्यक्ति बोकेको सो डुङ्गा दुर्घटनाग्रस्त भएको बताइएको छ ।

इजिप्टको सेख प्रान्तको कफ्रएल गाउँबाट इटालीतर्फ गैरकानुनी प्रवेशआज्ञा लिई बसाईसराईका लागि गइरहेका ती आप्रवासीको डुङ्गा दुर्घटना भएको थियो ।

सीमा सुरक्षा गार्डहरूले यस दुर्घटनामा परेका करिब १५० व्यक्तिलाई उद्धार गरेका छन् । उद्धार गरी निकालिएका केही व्यक्तिलाई भने उपचारार्थ अस्पताल लगिएको छ ।