लण्डन । नेपाली व्यवस्थापनमा लण्डन एल्थाममा सञ्चालित याक एण्ड यति रेष्टुरेन्ट पुनः संसदीय तहको प्रतिष्पर्धा टिफिन कपमा चुनिएको छ ।
स्थानीय सांसद क्लिभ एफोर्डले याक एण्ड यतिलाई आफ्नो क्षेत्रमा दक्षिण एसियाली खाना पस्कने सर्वोत्कृष्ट रेष्टुरेन्ट छान्न स्थानीयसंग गरेको आग्रहअनुसार रेष्टुरेन्ट छानिएको हो ।
बेलायती संस्था तथा व्यक्तिहरुले आ–आफ्नो क्षेत्रको एउटा उत्कृष्ट रेष्टुरेन्ट छानेपछि अन्तिम प्रतियोगिता बेलायती संसद् भवनमा गरी टिफिन कप प्रदान गर्ने प्रचलन छ । हालै सांसद एफोर्डले रेष्टुरेन्टमै गएर त्यस क्षेत्रको सर्वोत्कृष्ट रेष्टुरेन्टमा छानिएको जानकारी गराएका थिए । उनले उपाधिस्वरुप प्रमाणपत्र र भान्सेलाई विशेष किसिमको ज्याकेट समेत प्रदान गरे ।
सांसद एफोर्डले बधाइ दिंदै भने, “याक एण्ड यति दोस्रो वर्ष पनि सर्वोत्कृष्ट रेष्टुरेन्ट भएकोमा म ज्यादै खुसी छु । एकपटक मात्र सफल हुनु राम्रो कुरा हो तर दोहो¥याएर सफल हुनु भनेको ज्यादै गज्जबको कुरा हो किनभने बेलायतमा दक्षिण एसियाली खाना पस्कने कैयौं राम्रा रेष्टुरेन्ट छन् र तीमध्ये पनि यो सर्वोत्कृष्ट
बन्यो ।”
याक एण्ड यति सञ्चालक महेन्द्र कंडेलले सफलताका लागि अहोरात्र मिहिनेत गरिरहेका कर्मचारी र सम्पूर्ण ग्राहकहरुलाई धन्यवाद दिएका छन् । याक एण्ड यति कंडेल ग्रुप अफ कम्पनीजद्वारा लण्डनमा सञ्चालित चेन रेष्टुरेन्ट हो । यसले गत महिना मात्र फिन्सबरी पार्क, लन्डनमा आफ्नो शाखा थपेको थियो । यसबाहेक क्रिस्टल प्यालेस, एल्थाम र ब्रोम्लीमा पनि रेष्टुरेन्ट चालु छन् ।
