लण्डन । प्राय चिसो ठाउँ भनेर चिनिएको बेलायतमा अत्यधिक गर्मीका कारण जनजीवनमा आतङ्क नै मच्चिएको छ ।
बेलायतको मौसम कार्यालयले सोमबार र मंगलबार सबैभन्दा धेरै गर्मी हुने अनुमान गरेको छ भने यहाँ गर्मीका कारण संकट पनि घोषणा गरिएको छ । सोमबार र मंगलबार यहाँको तापक्रम ४१ डिग्रीसम्म पुग्नसक्ने बताइएको छ ।
यसअघि सन् २०१९ मा बेलायतमा तापक्रम ३८ डिग्रीसम्म पुगेको थियो ।
स्वास्थ्य मन्त्री स्टिभन बार्कलेले अत्यधिक गर्मीका कारण सर्वसाधारणमा पर्नसक्ने स्वास्थ्य संकटलाई ध्यानमा राखी फोन उठाउन अतिरिक्त मानिसहरु राखिएको बताएका छन् । उनले सर्वसाधारणलाई शीतलमा बस्न, पानी पिउन अपील गरेका छन् ।
यसका साथै अस्पतालहरुमा बेडहरु खाली राखिएको र एम्बुलेन्सहरुलाई तम्तयारी अवस्थामा राखिएको उनले बताएका छन् ।
बेलायत सरकारले गर्मीका कारण आउनसक्ने संकटलाई समाधान गर्न आजै मन्त्रिपरिषद्को उच्चस्तरीय बैठक पनि बसेको छ । यद्यपि सो बैठकको अध्यक्षता प्रधानमन्त्रीले गरेनन् ।
बेलायतमा वर्षेनी १ हजार ६०० मानिस गर्मीका कारण मर्ने गरेका छन् ।
बेलायतको करिब ८० प्रतिशत क्षेत्रमा सोमबार र मंगलबार ४० डिग्रीभन्दा बढी तापक्रम पुग्ने बताइएको छ ।
