काठमाडौँ । राष्ट्रपति विद्यादेवी भण्डारी साझा यातायातको विद्युतीय बसमा शीतल निवासदेखि पाटनढोकासम्मको यात्रा गर्नुभएको छ ।
राष्ट्रपति भण्डारी शनिबार दिउँसो शीतल निवासबाट विद्युतीय बसमा पाटनढोका पुग्नुभएको हो ।
पाटनढोका पुगेर उहाँले मदन पुरस्कार पुस्तकालयको अवलोकन गर्नुभयो । उहाँले पुस्तकालयमा रहेको हस्तलिखित स्वस्थानी व्रतकथाको समेत अध्ययन गर्नुभयो ।
त्यसपछि हिँडेर पिम्बहाः पुखु पुग्नुभएको थियो । पिम्बहाः मा उहाँले नेवारी भजन श्रवणसँगै पिम्बहाः पुखुको इतिहासका बारेमा जानकारी लिनुभएको थियो ।
काठमाडौँको रानीपोखरीभन्दा पुरानो पिम्बहाः पुखुको पुरानो नाम जगमदु पुखु हो । पुस्तकालय र पिम्बहाः पुखुको अवलोकनपश्चात् पुनः राष्ट्रपति भण्डारी साझाको विद्युतीय बसमा शीतल निवास फर्कनुुभयो ।
राजतन्त्र हुँदा राजाको सवारीका कारण लामो समय सडकमा सर्वसाधारणले पर्खनु परेकोमा गणतन्त्र आएपछि राष्ट्रपतिको सवारीका कारण उस्तै सास्ती भोग्नुपरेको सर्वसाधारणले गुनासो गर्ने गरेका छन् । राष्ट्रपति भण्डारीले केही साता अगाडीको एक टेलिभिजन अन्तर्वार्तामा सो कार्यको बचाउ गर्नुभएको थियो तर अहिले पदावधि सकिन लाग्दा बसमा यात्रा गरेर केही सन्देश दिन खोजेको भान भएको छ ।
