काठमाडौँ । काठमाडौँबाट दुबई प्रस्थान गरेको फ्लाई दुबईको जहाजमा चरा ठोक्किँदा जहाजमा आगोको झिल्को र ठूलो आवाज सुनिएको थियो ।
शुरुवातमा विमानको इन्जिन फेल भएको अनुमान गरिएको भए पनि फ्लाई दुबईले भने विमानमा चरा ठोक्किँदा सो आवाज र आगो देखिएको बताएको छ ।
विमानस्थलबाट उडे लगत्तै ठूलो आवाजसहित जहाजमा आगोको झिल्को देखिएपछि काठमाडौँमा सनसनी मच्चिएको थियो ।
काठमाडौँ विमानस्थलबाट उडेको केहीबेरमै जहाजको इञ्जिनमा समस्या आएपछि धादिङको धार्केमाथिको आकाश (२१ हजार फिटमाथि) मा पाँचदेखि सात मिनेट होल्ड गराइएको थियो । त्रिभुवन अन्तर्राष्ट्रिय विमानस्थलमा आकस्मिक अवतरणको तयारी गरिएको थियो । विमानस्थलको टावरका एटीसीले विमानचालक (पाइलट) सँग कम्युनिकेसन गरेपछि जहाज सामान्य तवरले गन्तव्यतर्फ उडेको विमानस्थलका महाप्रबन्धक प्रतापबाबु तिवारीले बताउनुभयो ।
जहाजको दुई इञ्जिन रहेकाले सुरुमा एक इञ्जिनले काम गरेको र अहिले दुवै इञ्जिन राम्ररी सञ्चालन रहेकाले जहाज गन्तव्यमै सामान्यरूपमा अवतरण हुने विमानस्थलले उल्लेख गरेको छ ।
जहाजमा १६७ यात्रु सवार रहेको विमानस्थलले जनाएको छ ।
सो घटनापछि करिब एक घण्टा त्रिभुवन अन्तर्राष्ट्रिय विमानस्थलमा उडान स्थगित गरिएको थियो ।
नेपाल नागरिक उड्डयन प्राधिकरणका प्रवक्ता जगन्नाथ निरौलाका अनुसार विमानस्थलको उडान अहिले सामान्य अवस्थामा सञ्चालन भइरहेको छ ।
