तमुधीं यूकेले आगामी डिसेम्बर २८ मा रजत महोत्सव मनाउने, नेपालबाट कलाकार आउने

लन्डन । तमुधीं यूकेले आगामी २८ डिसेम्बर २०२४ मा रजत महोत्सव मनाउने भएको छ ।

संस्था स्थापनाको २५ औं वसन्त पूरा भएको ऐतिहासिक अवसरमा शनिबार २८ डिसेम्बरमा ह्यारो लेजर सेन्टर लन्डनमा विविध रोचक तथा मनोरन्जनात्मक कार्यक्रमसहित रजत महोत्सव आयोजना गरिने तमु धीं यूकेका उपाध्यक्ष परशु गुरुङले जानकारी दिनुभयो । उहाँका अनुसार कार्यक्रम तयारीका लागि तमु धीं यूकेका अध्यक्ष हरि गुरूङको निर्देशनमा संस्थापक अध्यक्ष मिनप्रसाद गुरूङको संयोजनमा १ सय २५ जना रहेको सल्लाह तथा सुझाव समिति तथा उपाध्यक्ष कमल गुरूङको संयोजकत्वमा ल्होछार कार्यक्रम तयारी समिति गठन गरिएको छ ।

बेलायतका विभिन्न क्षेत्रमा बस्नुहुने सम्पूर्ण तमु महानुभावहरु, विशेषगरी तमुधीं यूकेका आजीवन सदस्य तथा उहाँहरु सपरिवारका साथ उपस्थित भइदिनुहुन आयोजकले अनुरोध गरेको छ । सहभागी हुनेहरुका लागि यात्रामा सहज होस् भन्ने हेतुले विभिन्न क्षेत्रबाट यातायातको पनि व्यवस्था गरिएको छ ।

गत शनिबार मिचेटस्थित आफ्नै भवनमा तमु धीं यूके अध्यक्ष हरि गुरुङको अध्यक्षतामा बसेको बैठकमा ल्होछार संयोजक तथा उपाध्यक्ष कमल गुरुङले ल्होछार र रजत उत्सवको तयारीका क्रममा भइरहेका प्रगतिका विषयमा जानकारी गराउनुभएको थियो । रजत महोत्सव सम्बन्धमा बनाइएको विभिन्न १४ समितिका संयोजकहरूले आ-आफ्नो धारणा राख्नुभएको बैठक सञ्चालक समेत रहनुभएका महासचिव डा. विशाल गुरुङले जानकारी गराउनुभएको छ ।

रजत महोत्स्वमा नेपालबाट कलाकारहरु आउँदैछन् । संस्थाले छनोट गरेकोमध्ये कलाकार तृष्णा गुरुङको ब्यान्डले भिसा पाइसकेको पनि जानकारी प्राप्त भएको छ । सोही बैठकमा वरिष्ठ उपाध्यक्ष जुमकाजी गुरुङले आजीवन सदस्य रात्रिभोजको आय-व्यय सहितको समीक्षा विवरण पावर प्वाइन्टमा प्रस्तुत गर्नुभएको थियो ।